झापाको अर्जुनधारा नगरपालिका–६ स्थित हिमाली एजुकेशन फाउण्डेशनले आज विविध कार्यक्रम गरी वार्षिकोत्सव मनाएको छ । गुणस्तरीय शिक्षालाई प्राथमिकतामा राख्दै आएको विद्यालयले विभिन्न कार्यक्रम गरी १७ औं वार्षिकोत्सव मनाएको हो ।
विद्यालय परिसरमा एक समारोहकाबिच आयोजित कार्यक्रम विद्यालयका संस्थापक अध्यक्ष खड्गराज गिरीको अध्यक्षता तथा प्याब्सन झापाका बरिष्ठ उपाध्यक्ष छत्र कार्कीको प्रमुख आतिथ्यतामा भएको हो ।
कार्यक्रममा प्रमुख अतिथि कार्कीले शैक्षिक क्षेत्रको विकासमा निजी विद्यालयको भूमिका महत्वपूर्ण भएको बताए । उनले स–साना बालबालिकालाई स्तरीय शिक्षा दिएर योग्य र सक्षम नागरिक उत्पादनमा निजी विद्यालयको योगदान बिर्सन नसकिने उल्लेख गरे ।
कार्यक्रममा विद्यालयकी शिक्षक एसिका राई र कर्मचारी पदम तामाङलाई नगदसहित सम्मान गरिएको थियो भने वार्षिकोत्सवको अवसरमा स्टुडेन्ट अफ द इयर कक्षा–७ का लासीम योङ्यालाई ट्रफी प्रदान गरिएको छ ।
कार्यक्रममा विद्यार्थीले बिभिन्न सन्देशमुलक संस्कृति झल्कने नृत्य, गायन , नाटक लगायत प्रस्तुत गरेका थिए । कार्यक्रममा प्याब्सन अर्जुनधाराका अध्यक्ष रुद्र सिटौला, विद्यालय अभिभावक संघ अध्यक्ष यामप्रसाद तिम्सिना, सचिव राजेशकुमार आचार्य, दशनामी प्रदेश अध्यक्ष प्रकाश पुरी, समाजसेवी चन्द्रप्रसाद गिरी, अर्जुन गिरी लगायतको आतिथ्य रहेको थियो । विद्यालयका शिक्षक बासुदेव बरालले स्वागत गरेको कार्यक्रमको सञ्चालन अध्ययनरत विद्यार्थीहरुले गरेका थिए ।
नर्सरीदेखि कक्षा–८ सम्म पठनपाठन हुने हिमाली एजुकेशन फाउण्डेशनका प्रिन्सिपल शान्ता गिरीले जानकारी दिइन ।
