झापाको बिर्तामोड स्थित झापा नाटक घरमा दैनिक मञ्चन हुँदै आएको नाटक रिफण्डको कथा वस्तुले शिक्षक, विद्यार्थी र अभिभावकहरूलाई झस्काई दिने गरेको छ ।
वर्तमान अवस्थामा नेपालको शिक्षा नीति, शिक्षकको कार्यशैली र विद्यार्थीको सिकाइलाई तिखो रुपमा व्यङ्ग्य प्रहार गरेको छ । नाटकका कलाकारहरूले गरेको अभिनय जीवन्त रहेको छ ।
कथा अनुुसार विद्यालयका एक विद्यार्थीले आफ्नो शैक्षिक प्रमाणपत्र लिनुहोस्, मैले पढ्दा लागेको खर्च फिर्ता दिनुहोस् भनेर गरेको प्रश्नले विद्यालयका प्रधानाध्यापक र शिक्षकहरुमा आई परेको कठिन परिस्थितिलाई कलाकारहरूले उत्कृष्ट ढंगले प्रस्तुत गरेका छन् ।
नाटकले दिन खोजेको सन्देश भने विद्यार्थीको हातमा शैक्षिक योग्यताको प्रमाण पत्र छ तर व्यवहारिक ज्ञान सीप नभएको कारण बेरोजगार छ ? भन्ने कुरा पुष्टि गर्न खोजेको छ ।
माघ १० गतेबाट मञ्चन हुन सुरु भएको नाटक रिफण्ड प्रसिद्ध हङ्गेरियन लेखक फ्रिज क्यारेन्थिद्वारा लिखित नाटक हो ।
मोरङ्ग विराटनगरको नाम्लो नाट्य समूह, झोराहाट नाट्य समूह र झापाको क्षितिज नाट्य प्रतिष्ठानको साझेदारीमा उक्त नाटक मञ्चन भइरहेको प्रतिष्ठानका केन्द्रीय अध्यक्ष तथा झापा नाटक घर निर्माण कार्यका अभियन्ता तथा परिकल्पनाकार, रङ्गकर्मी माधव कल्पितले बताए ।
उनका अनुसार यो नाटक कक्षा ११ को अनिवार्य अंग्रेजी पाठ्यक्रममा समावेश भएको नाटक सुदिपजंग कार्कीको निर्देशन रहेको नाटकमा सुरज माझी, दिक्षा चौधरी, वन्वो सन्तोष, प्रज्वल भट्टराई, प्रदिप दाहल, विवेक मिश्र र निर्देशक कार्कीको मुख्य अभियन रहेको छ । नाटकमा लाइट संयोजन सुशील कार्कीले गरेका छन् भने म्युजिक संयोजन सञ्जय मुडियारी गर्दै आएका छन् ।
दैनिक मञ्चन गरिदै आएको नाटक हेर्न दिउसो विद्यार्थी वर्गको बाक्लो उपस्थिति रहदै आएको छ भने बेलुका ४ः३० बजेको मञ्चनमा स्थानीय अभिभावक वर्गहरूको उपस्थिति रहँदै आएको छ ।
