झापाको हल्दिवारीमा करिव २५० विघामा मात्र तोरी खेती लगाएको पाइएको छ ।
संचारमाध्यमले प्रचार गरेजस्तो हल्दिवारीमा २५०० विघामा तोरी खेती नगरिएको हल्दिवारी गाउँपालिकाले स्पष्ट पारेको छ । तोरी खेतीका लागि यस वर्ष हल्दिवारी गाउँपालिकाले ७५ प्रतिशत अनुदानमा तीन हजार केजी तोरीको बीउ वितरण गरेको थियो ।एक विघामा १२ केजी तोरीको बीउ आबश्यक पर्छ । त्यो हिसाबले अनुदानको बीउबाट २५० बिघामा किसानले तोरी खेती लगाएको गाउँपालिकाका कृषि शाखाका प्रमुख छविलाल गुरुङले बताए । उनले अनुदानबाहेक आफ्नै बीउबाट करिव ५० विघामा किसानले तोरी लगाएको हुनसक्ने बताए । यसबाट हल्दिवारीमा जम्मा ३ सय विघामा तोरी लगाएको हुनसक्ने अनुमान गरिएको छ ।
प्रतिकेजी २५० रुपैयाँ पर्ने मोरङ २ जातको उन्नत तोरीको बीउ वितरण गरिएको थियो । ती बीउ ३२० जना किसानलाई वितरण गरिएको कृषि शाखा प्रमुख गुरुङले जानकारी दिए । तोरी खेती प्रवद्र्धनका लागि हल्दिवारी गाउँपालिकाले यस वर्ष ९ लाख रुपैयाँ बजेट छुट्याएको थियो । यसअघि गत वर्ष बजेट छुट्याएकोमा कुनै पनि किसान अनुदानका लागि नआएको गुरुङले बताए ।
झापामा करिव ५५ सय हेक्टर क्षेत्रफलमा यस वर्ष तोरी खेती गरिएको कृषि ज्ञान केन्द्र झापाले जनाएको छ । जिल्लाभरि नै तोरी खेती गरिएको कृषि ज्ञान केन्द्रका प्रमुख सागर विष्टले बताए । सबैभन्दा बढी तोरी खेती कचनकवल , कमल , गौरादह र बुद्धशान्तिमा गरिएको छ । हल्दिवारी चौथो स्थानमा आउने विष्टको भनाइ छ ।
