निजी तथा आवासीय विद्यालय अर्गनाइजेसन शिवसताक्षी झापाले पत्रकार विनोद सापकोटालाई सम्मान गरेको छ ।
शिवसताक्षी नगरको व्याङ्डाँडास्थित चेतना माध्यमिक विद्यालयको प्राङ्गणमा सोमबारदेखि सुरु अन्तर संस्थागत विद्यालयस्तरीय सांस्कृतिक प्रतियोगिताको समापन तथा पुरस्कार वितरण कार्यक्रममा प्रतिदिन दैनिकमा कार्यरत पत्रकार विनोद सापकोटा सम्मानित भएका हुन् । सापकोटा तीन दशकदेखि पत्रकारिता क्षेत्रमा क्रियाशील छन् ।
यस्तै लामो समय शिक्षा क्षेत्रमा सक्रिय शिक्षक डम्बरबहादुर खड्का पनि सम्मानित भएका छन् । उनी ध्रुवतारा आवासीय मावि दुधेका संस्थापक प्रिन्सिपल हुन् । शिवसताक्षी नगरपालिकाका नगर प्रमुख मेघाहाङ थोप्राले पत्रकार सापकोटा र शिक्षक खड्कालाई सम्मान गरेका हुन् । नगर प्रमुख थोप्रा, प्याव्सन शिवसताक्षीका अध्यक्ष राम सुहाङ र प्याव्सन पदाधिकारीले दुवै प्रतिभालाई दोसल्ला, सम्मानपत्र , फूलमाला र अविरले सम्मान गरेका थिए ।
यसैबीच, जिल्ला प्याव्सनको समन्वयमा शिवसताक्षी नगर प्याव्सनले आयोजना गरेको अन्तर निजी विद्यालयस्तरीय प्रतियोगितात्मक सांस्कृतिक कार्यक्रमअन्तर्गत सांस्कृतिक नृत्यतर्फ शिवगञ्जको दिक्षान्त प्रथम, शिवगञ्जै नवकिरण दोस्रो र क्याब्रिज तेस्रो भएका छन् । यस्तै राष्ट्रिय गीत नृत्यमा सगरमाथा पहिलो, ध्रुवतारा दोस्रो र निम्बस वोर्डिङ स्कूल तेस्रो भएका छन् । कक्षा ११ र १२ को एक मात्र सहभागी विद्यालय धु्रवताराले सो विधामा उपाधि उचालेको छ । यस्तै सिनियर गायनतर्फ निम्बस, ध्रु्वतारा र मेची बोर्डिङ स्कूल क्रमशः पहिलो, दोस्रो र तेस्रो भएका छन् । जुनियर गायनतर्फ धरमपुर प्रज्ञा पाठशाला, क्याम्ब्रिज र रेडरोज क्रमशः पहिलो, दोस्रो र तेस्रो भएका छन् ।
शिवसताक्षीबाट छनौट भएका हरेक विधाका पहिलोले पुस २ र ३ गते दमकमा हुने जिल्लास्तरीय प्रतियोगितामा सहभागिता जनाउन पाउने छन् । प्याव्सन शिवसताक्षीका अध्यक्ष राम सुहाङको अध्यक्षतामा भएको उद्घाटन सत्रमा उपाध्यक्ष उदयप्रकाश राईले स्वागत गरेका थिए भने प्याव्सनका सदस्य चन्द्र मादेम्बाले सहजीकरण गरेका थिए
