गौरीगञ्ज । झापा गौरीगञ्जकी एक महिलाले तिम्ल्याहा बच्चालाई जन्म दिएकी छिन् ।
गौरीगञ्ज गाउँपालिका–४ स्थित भवानीपुर सुकुम्वासी टोलकी रविना ताजपुरियाले नोबेल मेडिकल कलेज विराटनगरमा एकै पटकमा तीन जना बच्चालाई जन्म दिएकी छिन् ।
उनले तेस्रो पटकको सन्तानको रुपमा तीन वटा छोरालाई जन्म दिएकी हुन् । अहिले आमा र तीन वटै बच्चाको स्वास्थ्य अवस्था राम्रो रहेको सञ्जय ताजपुरियाले जानकारी दिए । विपन्न परिवारकी रविनालाई बच्चाहरूको पालन पोषण गर्न गाह्रो हुने भएकाले गाउँपालिकामा आवश्यक सहयोग गर्नेबारे छलफल भइरहेको जनाइएको छ ।
तिम्ल्याहा बच्चाको जन्म सात महिनामै भएको पारिवारिक स्रोतले जनाएको छ । सुत्केरी बेथा लागेपछि गौरीगञ्ज अस्पताल पुगेकी ताजपुरियालाई अस्पतालमा प्रसूति सेवा र शल्यक्रिया नहुने भएपछि आम्दा अस्पताल दमक पुर्याइएको थियो ।
त्यहाँ पनि सम्भव नभएपछि नोबेल लगिएको थियो । हाल बच्चा र आमा गरी चारै जनाको स्वास्थ्य अवस्था सामान्य रहेको पारिवारिक स्रोतले जनाएको छ।
