बिर्तामोड । एसईई परीक्षाफल प्रकाशित भए संगै अहिले बिद्यालयले विद्यार्थी भर्ना अभियान संचालन गर्दै आएका छन् ।
निजि भन्दा सामुदायिक बिद्यालय नै अब्बल भएका समाचार प्रकाशित भएपनी अभिभावक र विद्यार्थीको रोजाई भने निजि बिद्यालयनै देखिन्छ ।
सहर केन्द्रित केही सामुदायिक बिद्यालयमा विद्यार्थी थेग्न गाह्रो भएपनी गाउँ केन्द्रित बिद्यालयले समयानुकूल सुबिधा उपलब्ध गराउन नसक्दा विद्यार्थी संख्या न्यून हुने गरेको छ।
यस्तै बिर्तामोड नगरपालिका वडा नम्बर ७,८,९ को एकमात्र माध्यमिक तहको बिद्यालय दुर्गा मा.विका शिक्षक यति बेला गाउँ -गाउँमा कक्षा ११ मा अध्ययन गर्ने विद्यार्थी खोज्न विभिन्न कार्यक्रम र गतिविधि गरिरहेका छन् ।
अभिभावक र विद्यार्थी संग भेटघाट अन्तरक्रिया र ब्यानर,पोस्टर बितरण गर्दै विद्यार्थी आकर्षित गर्दै छन् । सहर केन्द्रीय बिद्यालयले गाउँका कुना कुना सम्म यातायातको सुबिधा दिएका कारण विद्यार्थी पनि उतै आकर्षित हुने गरेका छन् ।
बिर्तामोडमा रहेका देबि ,मोहनमायामा विद्यार्थीको चाप बाक्लो छ तर अन्य बिद्यालयमा विद्यार्थी संख्या कम हुनेगरेको पाईन्छ । दुर्गा माध्यमिक बिद्यालय कक्षा ११/१२ का इन्चार्ज उमानाथ भण्डारीका अनुसार अभिभावक नजिकैको स्कुल मन पराउने भएता पनि विद्यार्थी स्वतन्त्र हुन अर्को स्कुल खोज्ने गरेको बताउछन् । उनका अनुसार यातायात ,साथी र पहिरनका कारण विद्यार्थी स्थानीय बिद्यालय भन्दा बाहिर हुन चाहेको बताउँछन् ।
