झापा गाउँपालिका झापाका अरु स्थानियतह मध्ये पछाडी परेको गाउँपालिका हो । झापा जिल्लाको पुरानो सदरमुकामको रुपमा चिनिएको झापा गाउँपालिका २०१९ सालपछि सदरमुकाम चन्द्रगढीमा सरेसँगै विकासको हिसाबले पछाडि परेको हो । तरपनि स्थानीय जनप्रतिनिधिको प्रयासमा गाउँपालिकाले मुहार फेरिरहेको छ । स्थानीय तहमा जनप्रतिनिधि आएपछि अहिले देखिने गरि परिवर्तन भएको छ ।
शिक्षा क्षेत्रमा समेत गाउँपालिकाले काम गरिरहेको छ । शिक्षाको पहुँचमा सबै बच्चाहरुलाई पुर्याउन विभिन्न योजना समेत गाउँपालिकाले बनाइरहेको छ । कक्षा ९ मा पढ्ने छात्राहरुलाई साईकल बितरण देखि लिएर कक्षा ११ मा पढ्ने सबै विद्यार्थीहरुलाई लाग्ने शुल्क गाउँपालिकाले बेहोरिरहेको छ ।
मुस्लिम समुदायका बालबालिकाहरू पढ्ने मदरसालाई पढ्नका लागि राम्रो व्यवस्था मिलाउन भवन बनाउनेदेखि शिक्षक लाई तलब खुवाउने सम्मको व्यवस्था गाउँपालिकाले गरेको छ । यो सँगै गाउँपालिकाले एक कार्यक्रमका बिच सामुदयीक विद्यालयलाई प्रविधिमैत्री बनाउने उद्देश्यले ९६ लाख मुल्य बरावरको कम्प्युटर लगायतका सामग्री हस्तान्तरण गरेको छ । कोरोना भाइरसका कारण बितरणमा केहि ढिला भएपनि राम्रो काम गरेको महसुस भएको गाउँपालिका उपाध्यक्ष कुन्तिदेबी बुढाथोकिले बताइन् ।
सामुदायिक विद्यालयहरुमा प्रविधी मैत्री शिक्षा व्यावस्थापन कार्यक्रम अन्तर्गत २१ वटा सामुदायिक विद्यालय र ९ वटा मदर्सालाई प्रोजेक्टर १० थान, कम्प्युटर ९५ वटा, स्मार्ट बोर्ड ७ वटा, इ–हाजिरी मेशिन २१ वटा र केहि थान टिभी लगायतका सामग्री हस्तान्तरण गरिएको हो । यो सँगै सवै विद्यालयमा इन्टरनेट र विजुली सुविधा पु¥याइएको छ । बाटाघाटा र पुल लगायतमा मात्र नभएर शिक्षाको क्षेत्रमा समेत गाउँपालिकाले काम गरिरहेको गाउँपालिकाका प्रमुख प्रशासकिय अधिकृत जिवन निरौलाले बताए ।
यहाँ मुस्लिम वालवालीकाहरु धेरै भएकाले मदर्सामा अध्ययन गर्ने वालवालीकाहरुका लागि पनि सो प्रविधि हस्तान्तरण गरिएको गाउँपालिकाले जनाएको छ । शिक्षा स्वास्थ्य लगायतका क्षेत्रमा सकारात्मक परिवर्तन भएको र आगामी दिनहरुमा पनि थप नयाँ कामहरु हुने जनाइएको छ ।
