बिर्तामोड । राष्ट्रका लागि संगीत अभियात्रा अभियानले जनवादी कलाकारको सहभागिता विना कुनैपनि मेला तथा महोत्सव सञ्चालन नगर्न आग्रह गरेको छ । झापाको बिर्तामोडमा बिहीवार (आज) पत्रकार सम्मेलन गर्दै अभियात्राको टोलीले जनवादी कलाकारको सहभागिता विना कुनैपनि सार्वजनिक मेला महोत्सव सञ्चालन नगर्न अपिल गरेको हो ।
अभियात्राले छाडा खालका गीतले मेला महोत्सवमा प्राथमिकता पाइरहेको जनाउँदै जनवादी गीतलाई वेवास्ता गरेर कुनैपनि कार्यक्रम आयोजना नगर्न अपिल गरेको छ । सबै ठाउँमा आफूहरुको सहभागिता हुनुपर्ने अभियात्राको माग छ ।
अर्धनग्न नृत्य र छाडा गीत संगीतमा कुम हल्लाउने नेताहरुलाई पनि सचेत गराउन आवश्यक रहेको जनवादी कलाकार जीवन शर्माले बताए । जनवादी गीत र कलाकारको सहभागिताका लागि आयोजकलाई कन्भिन्स गर्ने पक्षमा अभियात्रा रहेको शर्माको भनाई छ ।
जनताको पक्षमा राज्यसत्ता नहुँदा जनताका कलाकारले वेवास्ताको शिकार हुनु परेकोले अब जनताले नै कलाकारको पक्षमा उचित निर्णय गर्ने दिन आएको शर्माले बताए । सोही अभियानकै क्रममा बिहीबार राष्ट्रका लागि संगीत अभियात्राको टोली झापा आइपुगेको छ । बामपन्थीनिकट जनवादी कलाकारको समूह अभियात्राका क्रममा बिहीबार झापा आइपुगेको हो ।
अभियात्राको टोलीमा २० जना कलाकारको सहभागिता छ । वरिष्ठ बामपन्थी जनवादी गायक जीवन शर्मा, मणि थापा, उदय श्रेष्ठ, माधव प्रधान लगायतका ख्यातिप्राप्त कलाकारको आयोजनामा राष्ट्रका लागि संगीत अभियात्रा भइरहेको हो ।
चैत ४ मा धनगढीबाट अभियात्रा शुरु भएको थियो । अभियात्राको टोलीले झापाको बिर्तामोडस्थित सिटी सेन्टरको साइ पार्टी प्यालेसमा चैत २५ गते दिउँसो १ बजे आफ्नो साङ्गीतिक प्रस्तुतिको आयोजना गरेको जनाइएको
उक्त कार्यक्रममा नेपालका ख्यातिप्राप्त वरिष्ठ जनगायक जीवन शर्मा , वरिष्ठ जनवादी गितकार तथा गायक उदय श्रेष्ठ ओम श्रेष्ठकाे बेजाेड प्रस्तति रहने अभियात्राले जनाएकाे छ । कार्यक्रममा चिरन सि , नारायण शर्मा ,माेहन श्रेष्ठ ,कुस्मिता दर्लामी,उदय रिजाल,सन्ध्या मगर ,कविता पुन,लक्षमण पाख्रिम,अनु शर्मा,स्नेहा गौतम,डम्मर भण्डारी ,रेस्मी बुढामगर,लक्ष्मी केसी, कुबेर सिले झापालि दर्शकलाई जनसाङ्गीतिक प्रस्तुति मार्फत मनाेरञ्जन गराउने छन ।
