झापा, असोज ६ । राष्ट्रिय स्वतन्त्र पार्टी झापाले प्रतिनिधिसभा निर्वाचनको लागि प्रत्यक्षतर्फ झापाबाट ४ उम्मेदवारको नाम सिफारिस गरेको छ ।
पार्टीको जिल्ला समिति बैठकले १, २, ३ र ४ निर्वाचन क्षेत्रका लागि उम्मेदवारको नाम केन्द्रमा सिफारिस गरेको हो । सो पार्टीले क्षेत्र नम्बर १ का लागि ओमनाथ भण्डारी, २ का लागि रुद्रप्रसाद गिरी, ३ का लागि प्रकाश पाठक र ४ का लागि शम्भुप्रसाद ढकालको नाम सिफारिस गरेको हो । क्षेत्र नम्बर ५ को उम्मेदवार भने सिफारिस हुन बाँकी छ । जिल्ला समितिले सिफारिस गरेपनि सबै उम्मेदवार पार्टीको प्रारम्भिक निर्वाचन प्रक्रियामा सहभागी हुनेछन् ।
क्षेत्र नम्बर १ बाट सिफारिस भण्डारी धुलाबारीका युवा व्यवसायी हुन् । भण्डारीले झापामा स्वतन्त्र अभियानको अगुवाई गरेका थिए । निर्वाचन क्षेत्र नम्बर २ बाट सिफारिसमा परेका गिरी कृषि तथा पर्यावरणविद् हुन् । अर्जुनधारालाई कर्मक्षेत्र बनाएका गिरीले अमेरिकामा अध्ययन गरेर चितवन हुँदै गृहजिल्ला झापा आएका हुन् । झापा क्षेत्र नम्बर ३ बाट सिफारिसमा परेका पाठक पूर्वसञ्चारकर्मी हुन् । झापाको पाथीभरा एफएफबाट करियर सुरु गरेका पाठक लामो समय रेडियो कान्तिपुरमा कार्यरत थिए । राजनीतिमा आउनुअघि उनी रबि लामिछानेसंगै ग्यालेक्सी टेलिभिजनमा आबद्ध थिए । सामाजिक अभियन्ताको रुपमा छबि बनाएका ढकाल सरकारी सेवाबाट अवकास पाएर सामाजिक अभियानमा लागेका व्यक्ति हुन् । उनी लेखकको रुपमा शम्भु सुस्केराको नामले परिचित छन् ।
रास्वपाको प्रारम्भिक निर्वाचनमा सहभागी हुन झापाबाट प्रत्यक्षमा २४ जनाले नाम दर्ता गराएका थिए । जिल्ला समितिले सिफारिस गरेपनि असोज १० देखि हुने छनोट प्रक्रियामा सबै जना सहभागी हुनुपर्नेछ । प्रारम्भिक निर्वाचनलगत्तै उमेदवारको अन्तिम टुंगो लाग्ने पार्टीका जिल्ला सभापति उमेश खरेलले बताए ।
राष्ट्रिय स्वतन्त्र पार्टीको समानुपातिकतर्फको बन्द सूचीमा झापाबाट ४ जना परेका छन् । उनीहरु प्रारम्भिक निर्वाचनमा सहभागी भएर १ सय १० जनाको सूचीमा परेका हुन् । सूचीमा ईन्दिरा राना मगर, निशा डाँगी, रुपा लावती र मनोज राजवंशी परेका हुन् ।
