२३ भदौ, बिर्तामोड । बिर्तामोड नगरपालिकाले सार्वजनिक पैनी , कुलो र सडक क्षेत्र अतिक्रमण गरी अनधिकृत रुपमा निर्माण गरिएका भौतिक संरचना भत्काउने भएको छ ।
नगरपालिकाले सार्वजनिक सूचना जारी गरी ती अनधिकृत संरचना हटाउन १५ दिनको अल्टिमेटम दिएको हो । त्यस सूचनाको बेवास्ता गरी भौतिक संरचनाहरु नहटाएमा कानून बमोजिम कार्वाही प्रक्रिया अघि बढाइने नगरपालिकाका प्रमुख प्रशासकीय अधिकृत विनोदकुमार न्यौपानेद्वारा जारी सूचनामा उल्लेख छ ।
न्यौपानेद्वारा बुधवार जारी सूचनामा भनिएको छ,‘बिर्तामोड नगरक्षेत्रभित्र रहेका बिभिन्न पुराना सार्वजनिक पैनी तथा कुलोहरुमा अनधिकृत रुपमा भौतिक संरचनाहरु निर्माण गरी पानी निकास अवरुद्ध गरेको पाईनुका साथै विभिन्न सार्वजनिक सडकहरुको क्षेत्र समेत अतिक्रमण गरी अनधिकृत रुपमा भौतिक संरचनाहरु बनाई बसोबास गरिरहेको पाईएकाले त्यस प्रकारका कार्यहरु तुरुन्त बन्द गरी अनधिकृत रुपमा निर्माण गरिएका भौतिक संरचना सूचना प्रकाशन भएको मितिले १५ दिनभित्र हटाई सार्वजनिक सम्पत्तिको संरक्षण तथा संबर्द्धनमा सहभागी हुन सम्बन्धित सबैको जानकारीका लागि यो सूचना प्रकाशन गरिएको छ । सूचनाको बेवास्ता गरि भौतिक संरचनाहरु नहटाईएमा कानुन बमोजिम कारबाही प्रक्रिया अघि बढाईने व्यहोरा समेत यसै सूचनामार्फत् जानकारी गराईन्छ ।’
बिर्तामोड नगरक्षेत्रभित्र पैनी , कुलो र सडकको कयौ विगाह जग्गा अतिक्रमण गरी संरचना निर्माण गरिएको छ । मेची आँखा अस्पतालको दक्षिणपट्टी बिर्तामोड– भद्रपुर सडकको क्षेत्रसम्म व्यवसायीहरुले ट्रस बनाएपछि त्यसलाई लक्षित गरी नगरपालिकाले सूचना जारी गरेको हो । त्यस्तै बिर्तामोड १० सैनिक बजारमा रहेको पैनीमा बनाइएका टहराहरुलाई हटाउन सो सूचना जारी गरिएको प्रमुख प्रशासकीय अधिकृत न्यौपानेले बताए । त्यस्तै बिर्तामोडबाट भद्रपुरतर्फ जाने सडकमा मुक्तिचोक दक्षिण व्यवसायीहरुले सडक क्षेत्र मिचेर पसल अगाडि ट्रस बनाएकाले ती संरचना पनि हटाउने कार्यपालिका बैठकले निर्णय गरेको न्यौपानेले जानकारी दिए ।
