श्रावण २१ काठमाडौं : निर्वाचन आयोगले संघ र प्रदेशको चुनावमा गठबन्धन दलहरुले एउटै निर्वाचन चिन्ह पाउने व्यवस्था अगाडि सारेको छ । आयोगको शुक्रबार बसेको बैठकले राजनीतिक दलसम्बन्धी ऐन २०७३ को दफा ४९ बमोजिम उक्त व्यवस्था गरेको हो।
एमालेलाई रोक्न सरकारले सबै विकल्प अगाडि सारेको देखिन्छ । राजनीतिक दलसम्बन्धी ऐन, २०७३ को दफा ४९ मा दुई वा त्यो भन्दा बढी दलहरु एकल निर्वाचन चिन्ह लिई निर्वाचनमा भाग लिन पाउने व्यवस्था छ ।
‘दुई वा सोभन्दा बढी दलले एकल चुनाव चिन्ह लिई निर्वाचनमा भाग लिने प्रायोजनका लागि दल दर्ताको निवेदन दिँदा राजनीतिक दलसम्बन्धी नियमावली, २०७४ को अनुसूची-१३ बमोजिमको ढाँचामा दिनुपर्ने व्यवस्था गरिएको छ,’ आयोगद्वारा जारी विज्ञप्तिमा भनिएको छ।
त्यस्तो दल दर्ताको लागि निवेदन दिँदा संविधानको धारा २६९ को उपधारा ४ बमोजिमका शर्तहरु पूरा गरेको र प्रतिबद्धतापत्र समेत पेस गर्नुपर्ने आयोगले जनाएको छ।
आगामी मंसिर ४ गतेका लागि संघ र प्रदेश निर्वाचन सरकारले तोकेको छ ।
हाल गठबन्धनमा कांग्रेस ,माओवादी लगायतका ५ दल छन् भने एमाले ,राप्रपा लगायतका केही साना दल विपक्षमा छन् । अहिले सम्म एमाले ,राप्रपाले गठबन्धनमा जाने या एक्लाएक्लै चुनाव लढ्ने केही बताएका छैनन् ।
