झापाको शिवसताक्षी नगरपालिका वडा नं. ४ मा निर्माणाधिन १० मेघावाट क्षमताको सौर्य उर्जा परियोजना सम्पन्न गर्नका लागि दुईवटा बैंकसँग लगानी सम्झौता गरिएको छ ।
झापा इनर्जी लिमिटेडले २०८० को वैशाख महिनाभित्रै विद्युत् उत्पादन गरिसक्ने लक्ष्यका साथ सञ्चालन गरिरहेको परियोजना पूर्णताका लागि दुईवटा बैंकसँग लगानी सम्झौता गरिएको हो । झापा इनर्जीका प्रबन्ध सञ्चालक सुभाष भट्टराईका अनुसार माछापुच्छ्रे बैंक र सिमिल बैंकसँग लगानी सम्झौता भएको हो ।
तत्कालीन संविधानसभाका अध्यक्ष सुवासचन्द्र नेम्वाङको प्रमुख आतिथ्यमा सोमबार साँझ काठमाडौंमा लगानी सम्झौता पत्रमा हस्ताक्षर भएको हो । सम्झौतापत्रमा झापा इनर्जीका प्रबन्ध सञ्चालक सुभाष भट्टराई र दुईवटै बैंकका प्रमुख कार्यकारी अधिकृतहरुले हस्ताक्षर गरेका छन् ।
करिब ८० करोड रुपैयाँको सो परियोजनामा माछापुच्छ्रे बैंकको संयोजनमा ७५ प्रतिशत अर्थात् ६० करोड रुपैयाँ लगानी गरिनेछ । परियोजना सम्पन्न गरी आगामी वैशाख महिनाभित्रै विद्युत् उत्पादन गरिसक्ने लक्ष्यका साथ काम भइरहको प्रबन्ध सञ्चालक भट्टराईले जनाएका छन् ।
