नेपाली युवा महिला क्रिकेट टोलीले आईसीसी यू–१९ महिला ट्वान्टी–२० विश्वकप एसिया छनोट प्रतियोगितामा थाइल्यान्डविरुद्ध जितका लागि ९० रनको लक्ष्य पाएको छ ।
आज मलेसियाको यूकेएम–वाईएसडी क्रिकेट ओभलमा नेपालकी कप्तान कृतिका मरासिनीले टस जितेर फिल्डिङ गर्ने निर्णय गरेकी थिइन् । त्यसपछि ब्याटिङ गरेको थाइल्यान्डले निर्धारित २० ओभरमा ७ विकेट गुमाएर ८९ रन बनाएको हो ।
नेपालकी मनीषाकुमारी उपाध्याय र कप्तान कृतिका मरासिनीले समान दुई विकेट लिए । स्नेहा महराको नाममा एक विकेट रह्यो ।
नेपालले आज भुटानविरुद्ध खेलेको टोलीमा दुई खेलाडी परिवर्तन गरेको छ । भुटानविरुद्ध खेलेको टिममा किरन कुँवर र एलिसा यादवको स्थानमा अञ्जली विश्वकर्मा र रञ्जु श्रेष्ठलाई टोलीमा समावेश गरिएको छ ।
नेपालले पहिलो खेलमा कतारलाई ७९ रनले पराजित गरेको थियो । दोस्रो खेलमा नेपाल युनाइटेड अरब इमिरेट्स (यूएई)सँग १० विकेटले हारेको थियो । नेपालले तेस्रो खेलमा भुटानलाई ४ विकेटले हराएको थियो ।
