रामचन्द्र पौडेलको नेतृत्वमा सत्ता गठबन्धनको निर्वाचन तयारी तथा अनुगमन समितिको बैठक आज बस्दै

संवाददाता/ मङ्गलबार, जेठ १७, २०७९

सत्ता गठबन्धनको निर्वाचन तयारी तथा अनुगमन समितिको बैठक आज बस्दै छ । नेपाली कांग्रेसका नेता रामचन्द्र पौडेल नेतृत्वको समितिको बैठक बस्न लागेको हो ।

बैठक अपराह्न ४ बजेपछि प्रधानमन्त्रीको सरकारी निवास बालुवाटारमा बस्ने बताइएको छ । बैठकमा स्थानीय तह निर्वाचनको समीक्षा गरिने तयारी छ ।

यस्तै, ७७ जिल्लामा हुने जिल्ला समन्वय समिति निर्वाचनका विषयमा पनि छलफल हुनेछ । कार्यपालिका गठन हुन बाँकी स्थानीय तहका विषयमा समेत छलफल हुने बताइएको छ ।

यसअघि, सोमबार सत्ता गठबन्धनमा आबद्ध दलका नेताको बैठकले निर्वाचनको समीक्षा गरेको थियो । आसन्न जिसस निर्वाचनमा पनि गठबन्धन गर्न तल्ला तहलाई निर्देशन दिएको थियो ।