नेपाली कांग्रेसका नेता डा. शेखर कोइरालाले नेपाल प्रहरीको प्रमुख नियुक्तिसम्बन्धी सरकारको निर्णयको चर्को विरोध गरेका छन्। आज बसेको मन्त्रिपरिषद्को बैठकले धीरजप्रताप सिंहलाई आइजिपीमा नियुक्त गरेपछि नेता कोइरालाले सरकारको निर्णयको विरोध गरेका हुन्।
सिंहसँगै विश्वराज पोखरेल, सहकुलबहादुर थापा र रवीन्द्रबहादुर धानुक पनि प्रहरी महानिरीक्षक बन्ने दौडमा थिए। सरकारले तेस्रो वरियतामा रहेका सिंहलाई आइजिपी नियुक्त गरेपछि नेता कोइरालाले चर्को असन्तुष्टि व्यक्त गरेका हुन्।
उनले सरकारको निर्णयले विधिको शासनको खिल्ली उडाएको आरोपसमेत लगाएका छन्।
नेता कोइरालाले सामाजिक सञ्जालमा ट्विट गरेका छन्, ‘वरीयता र प्रक्रिया मिचेर नेपाल प्रहरीको आइजिपी नियुक्त गर्ने सरकारको निर्णयले विधिको शासनको खिल्ली उडाउने काम गरेको छ। सरकारको यो निर्णयले सिंगो प्रहरी संगठनलाई फेरि एकपटक विवादमा ल्याएको छ।’
सरकारको निर्णयले सिंगो प्रहरी संगठनलाई फेरि एकपटक विवादमा मुछेको उनको भनाइ छ।
