२ झापा । झापाको मेचिनगरमा रहेको नेपाल बहुउद्देश्यीय सहकारी संस्था द्धारा सञ्चालित एनएमसी डेरी उद्योगको सातौ वार्षिकोत्सव शुक्रबार मनाइएको छ ।
वार्षिकोत्सवको अवसरमा अध्यक्ष रामचन्द्र उप्रेती द्धारा लिखित ‘एनएमसी डेरी सफलताको कथा’ नामक पुस्तक विमोचन गरिएको हो ।
एनएमसी डेरी परिसरमा आयोजित वार्षिकोत्सव समारोहका प्रमुख अतिथि प्रदेश सहकारी राजिष्ट्रार तथा सहकारी प्रशिक्षण कार्यालय प्रदेश नम्बर १ का निमित्त रजिष्ट्रार हरिबहादुर खत्रीले पुस्तकको विमोचन गरेको हुन् ।
कार्यक्रममा बोल्दै रजिष्ट्रार खत्रीले नेपालका सहकारीलाई पैसाको ब्यापार गर्ने अखडाको रूपमा मात्र हेर्ने गरिएकोले तल्लो बर्ग सम्म यसको महत्त्व बुझाउन गाह्रो भएको बताए ।
एनएमसीका वरिष्ठ उपाध्यक्ष तथा एनएमसी डेरी व्यवसाय उपसमितिका संयोजक नारायणप्रसाद कोइरालाको अध्यक्षतामा आयोजित वार्षिकोत्सव समारोहमा उनले डेरीको प्रगति प्रतिवेदन प्रस्तुत गरेका थिए ।
हाल डेरी उद्योगमा ८० जनाले प्रत्यक्ष रोजगारी पाएको उल्लेख गर्दै वरिष्ठ उपाध्यक्ष कोइरालाले डेरी उत्पादनको मासिक ३ देखि साढे ३ करोड रुपैयाँको उत्पादन बिक्री हुने जानकारी दिए ।
विमोचित पुस्तकको समीक्षा पत्रकार मोहन काजी न्यौपाने र संस्थाका सञ्चालक समिति सदस्य कमल गुरागाईले गरेका थिए। डेरी प्रशासन प्रमुुख नवराज अधिकारीले सञ्चालन गरेको सो समारोहमा मेचीनगर–८ का वडाध्यक्ष विकेन्द्र धिमालले शुभकामना मन्तव्य राखेका थिए भने एनएमसी डेरी व्यवसाय उपसमितिका सदस्य नारायण बस्नेतले स्वागत गरेका थिए ।
