असार २०, काठमाडौं । बारा, ताप्लेजुङ र इलाममा करेन्ट लागेर तीनजनाको मृत्यु भएको छ ।
बाराको सुवर्ण गाउँपालिका–७, सन्फुलवा बस्ने ३० वर्षीय मुन्ना्प्रसाद यादवको करेन्ट लागेर शनिबार साँझ मृत्यु भएको छ । आफ्नै घरको कलमा हात मुख धुने क्रममा कलमा जोडेको मोटरबाट करेन्ट लागेर गम्भीर घाइते भएका उनको जिल्ला अस्पताल कलैयातर्फ लैजाने क्रममा बाटोमै मृत्यु भएको हो ।
ताप्लेजुङको सिरिजंघा गाउँपालिका–२, पुल्चोकस्थित सुन्तली हाइड्रोपावरमा काम गर्ने सोही ठाउँ बस्ने २२ वर्षीय प्रमोद कुँवरको काम गर्ने क्रममा अचानक करेन्ट लागेर शनिबार मृत्यु भएको छ ।
इलामको माङसेबुङ गाउँपालिका–५ बस्ने ४० वर्षीय प्रविन राईको करेन्ट लागेर शनिबार साँझ मृत्यु भएको छ । माई नगरपालिका–४ स्थित घरबाट विद्युत्को तार जोडी गङटेखोलामा माछा मार्ने क्रममा करेन्ट लागेर गम्भीर घाइते भएका उनलाई उपचारको लागि माई नगरपालिकाको तारा मेडिकलतर्फ लैजाने क्रममा बाटोमै मृत्यु भएको प्रहरीले जनाएको छ ।
