२७ बैशाख, चितवन । कोरोना महामारीको दोश्रो लहरका कारण जारी लकडाउनको असर देशका सबैजसो क्षेत्रमा परेको छ । त्यसमा पनि लकडाउनको अवधी बढ्दै जाँदा बिपन्न, मजदुर, अपांगता भएका ब्यक्तिहरु एवम समलिङ्गी, तेस्रोलिङ्गीहरु झन बढी प्रभावित भएका छन ।
यसै सन्दर्भमा चितवनमा संचालित ‘सेभ द माइण्ड नेपाल’ नामक संस्थाले समलिङ्गी तथा तेस्रोलिङ्गी २३ परिवार एवम एउटा दृस्टीविहिन परिवारलाई अत्यावश्यक खाद्यान्न सहयोग गरेको छ ।
नारायणगढको पोखरा बसपार्कमा सम्पन्न सहयोग हस्तान्तरण कार्यक्रममा हाल मकाउमा रहेका सुदर्सन थापा मगरले नर्भिक अस्पतालमा उपचाररत आफ्नी श्रीमतीको स्वास्थ्य लाभको कामना गर्दै ३० हजार बराबरको खाद्यान्न सहयोग गरेको जानकारी दिईएको छ । त्यस्तै सेभ द माईण्डकी अध्यक्ष पुजा भुसालले १० हजार बराबरको खाद्यान्न सहयोग गरेकी थिईन । कार्यक्रममा बोल्दै भुसालले निषेधज्ञाको समयमा पनि आफु अति बिपन्न, अशक्त अपांग, दृष्टि बिहिन एवम समलिङ्गी तेस्रोलिङ्गीहरु को सहयोगमा जुटिरहेको बताईन ।
सो अवसरमा समलिङ्गी तथा तेस्रो लिङ्गी को तर्फबाट देभ श्रेष्ठले विपत्तिको समयमा आफ्नो समुदायको पक्षमा बोल्ने र सहयोग गर्ने कोहि नभएको गुनासो गर्दै संस्थाले सम्झिएर सहयोग गरेकोमा धन्यवाद दिए । उनले एकपटकका लागि सहयोग गर्ने मात्र नभएर जिवनभरीलाई पुग्ने सीप सिकाउन सिपमुलक तालिमको ब्यबस्था गरिदिन आग्रह समेत गरे ।
सेभ द माइन्ड नेपालले स्थापनाकाल देखिनै समस्यामा परेकाहरुलाई सहयोग गर्दै आएकाले समलिङ्गी, तेस्रो लिङ्गीहरुका लागि सिपमुलक तालिमको कार्यक्रम छिट्टै लिएर आउने संस्थाकी कार्यसमिति सदस्य रिता पाठकले बताईन । कार्यक्रममा सक्षम नेपालका अध्यक्ष प्रकाश थापा, रोजिना त्रिपाठी लगायत सहभागी थिए ।
