झापाको बिर्तामोड-४ मा अवस्थित गोमेन्द्र मल्टिपल कलेजले विद्यार्थीहरूको व्यक्तित्व तथा व्यावहारिक क्षमता विकास गर्ने उद्देश्यले आजदेखि क्षमता अभिवृद्धि कार्यशाला सुरु गरेको छ ।
विद्यार्थीहरूको आत्मविश्वास, सञ्चार सीप, नेतृत्व क्षमता तथा व्यावहारिक दक्षता अभिवृद्धि गर्ने लक्ष्यसहित कार्यशाला सञ्चालन गरिएको हो ।
इनसाइटफुल पाथवेज ट्रेनिङ कन्सल्टेन्ट्सको सहजीकरणमा सञ्चालन भइरहेको कार्यशालामा बीबीए तेस्रो सत्रका ९० भन्दा बढी विद्यार्थी सहभागी छन् ।
उक्त कार्यशालामा प्रशिक्षकहरू पुष्पाञ्जली ठकुरी सिन्हा, फणिन्द्र दाहाल र कमला भट्टराईले प्रशिक्षण दिनेछन् ।
कार्यशालामा विद्यार्थीहरूलाई व्यक्तित्व विकास, सञ्चार सीप, सार्वजनिक वक्तृत्वकला, नेतृत्व विकास, समूहमा काम गर्ने क्षमता तथा आत्मविश्वास अभिवृद्धिलगायतका विषयमा प्रशिक्षण दिइनेछ ।
कलेजका प्राध्यापक डा.रूपक खनालले यस्ता कार्यशालाले विद्यार्थीको सैद्धान्तिक ज्ञानलाई व्यावहारिक सीपसँग जोड्दै आत्मविश्वास र क्षमता विकासमा महत्वपूर्ण भूमिका खेल्ने बताए ।
त्यस्तै प्रशिक्षक पुष्पाञ्जली ठकुरी सिन्हाले विद्यार्थीहरूलाई किताबी ज्ञानसँगै जीवन र व्यावसायिक क्षेत्रमा आवश्यक पर्ने सीप सिकाउने उद्देश्यले प्रशिक्षण सञ्चालन गरिएको बताएकी छन् ।
मङ्सिर १० गते समापन हुने कार्यशाला फलदायी रहने विश्वास सहभागी विद्यार्थीहरूले व्यक्त गरेका छन् ।







