आइसीसी विश्वकप क्रिकेट लिग-२ अन्तर्गत क्यानडासँगको खेलमा नेपाल २४ रनले पराजित भएको छ ।
ओमानको अल अमिरात क्रिकेट मैदानमा क्यानडाले दिएको २५७ रनको लक्ष्य पछ्याएको नेपाल ४६ ओभरमा २३२ रनमा समेटिएको हो ।
यसअघि टस जितेर पहिले ब्याटिङ गरेको क्यानडाले निर्धारित ५० ओभरमा सबै विकेट गुमाएर २५६ रन बनाएको थियो । क्यानडाका लागि श्रेयस मोभाले ११७ बलमा १०५ रनको शतकीय पारी खेलेका थिए ।
आरोन जोन्सनले ३६, हर्ष ठाकरले ३४ र हम्जा तारिकले ३० रन बनाए । नेपालका लागि ललित राजवंशीले चार विकेट लिए भने सन्दीप लामिछानेले तीन, दीपेन्द्रसिंह ऐरीले दुई र रोहित पौडेलले एक विकेट लिएका थिए ।
२५७ रनको लक्ष्य पछ्याउने क्रममा नेपालका अर्जुन कुमालले सर्वाधिक ८७ रनको योगदान दिए । यसैगरी दीपेन्द्रसिंह ऐरीले २७, गुल्शनकुमार झा र इशान पाण्डेले २१-२१, आसिफ शेखले २०, रोहितकुमार पौडेलले १८ र करण केसीले अविजित १७ रन बनाए । हारसँगै विश्वकप क्रिकेट लिग-२ को अंक तालिकामा नेपाललाई धक्का लागेको छ ।
नेपाल २८ अंकसहित तालिकाको ७ औँ र क्यानडा २९ अंक सहित तालिकाको ६ औँ स्थानमा छन् ।
