एउटा वैज्ञानिक अध्ययनले दुई वर्षको उमेरसम्म चिनी नखाँदा वा निकै कम खाँदा मस्तिष्कको स्वास्थ्य राम्रो बनाउन सक्ने देखाएको छ ।
बेलायतमा भएकाे अनुसन्धानको निष्कर्ष अनुसार बच्चा गर्भमा आएपछि आमाले र जन्मेको दुई वर्षसम्म बच्चाले चिनी नखाएमा त्यस्ता बालबालिकामा दशकौँपछि मस्तिष्कको स्वास्थ्य राम्रो बनाउन सकिने देखिएको हो ।
अनुसन्धानको नतिजा अनुसार चिनी नखाएमा वा निकै कम खाएमा त्यस्ता बच्चामा वयस्क भएपछि बिर्सने रोग अर्थात् ‘डिमेन्सिया’ को जोखिम २३ प्रतिशत कम रहेको पाइएको बीबीसीले जनाएको छ ।
अनुसन्धानकर्ता झेङका अनुसार यो अध्ययन झन्डै ६५ हजार व्यक्तिको अवलोकनमा मात्रै आधारित भएकाले बाल्यकालको चिनी सेवनले नै मस्तिष्कमा प्रत्यक्ष असर गर्छ भनेर पूर्णरूपमा निर्क्याेल गर्न थप अनुसन्धानको आवश्यकता छ ।
टाइप-टु मधुमेह र उच्च रक्तचापलाई पनि डिमेन्सियाको जोखिम बढाउने प्रमुख कारकका रूपमा मानिन्छ ।
यसैबीच अन्य स्वास्थ्य विज्ञहरूले भने दशकौँअघिको खानपान र जीवनशैलीका आधारमा अहिलेको स्वास्थ्य परिणाम अनुमान गर्दा जीवनशैलीका अन्य थुप्रै पक्षहरू पनि जोडिन सक्ने औँल्याएका छन् ।
उनीहरूका अनुसार अवलोकनमा आधारित यस अध्ययनले आहार र डिमेन्सियाको जोखिमबीच सम्बन्ध रहेको देखाए पनि चिनीकै कारण बिर्सने रोग लाग्छ भन्ने ‘प्रत्यक्ष कारण र प्रभाव’ को सम्बन्ध भने प्रमाणित गर्न सक्दैन ।
