अर्जुनधारा नगरपालिकाको शिक्षा, युवा तथा खेलकुद शाखाको आयोजनामा ‘नगर उत्कृष्ट विद्यालय तथा विद्यार्थी, स्थानीय पाठ्यक्रम विकास समिति एवं पाठ्यक्रम लेखन विज्ञ सम्मान तथा प्रोत्साहन कार्यक्रम’ सम्पन्न भएको छ ।
कार्यक्रममा २०८१/८२ को परिक्षामा उत्कृष्ट जिपिए ल्याएर उत्तिर्ण हुने सामुदायिक विद्यालयका कक्षा ८ तर्फ ओम बिक्रम न्यौपाने सिंहदेवी मावि, ह्रदयेन्द्र किरण नेपाल लक्ष्मी मावि, एसईई परिक्षा दिने आसुतोस ढुङ्गेल लक्ष्मी मावि, निश्चल खतिवडा शनिश्चरे मावि, सम्झना अधिकारी लक्ष्मी मावि, प्रिया सापकोटा शनिश्चरे मावि, तथा संस्थागत विद्यालय २०८२ कक्षा ८ सामर्थ्य पोख्रेल बृलियन्ट प्युपल्स सेकेण्डरी स्कुलका विद्यार्थीहरुलाई नगदसहित कदरपत्रले सम्मान गरिएको थियो ।
त्यसैगरी २०८२ को नगर स्तरीय कक्षा ८ मा उत्कृष्ट नतिजा ल्याउने महारानीगञ्ज मावि र प्रधानाध्यापक मनबहादुर लिम्बू र एसईईमा उत्कृष्ट नतिजा ल्याउने लक्ष्मी मावि र प्रधानाध्यापक निर्मला पोख्रेललाई कदरपत्रसहित सम्मान गरिएको थियो ।
सोही क्रममा स्थानीय पाठयक्रम निर्माण समितिका संयोजक बद्रीप्रसाद ओली, सूर्यप्रसाद सापकोटा, तेजस्वी पौडेल, रुद्र खतिवडा लगायतलाई सम्मान गरिएको थियो ।
कौशिकलाल परियारको अध्यक्षतामा भएको कार्यक्रममा नगर प्रमुख बलदेव सिंह गोम्देन प्रमुख अतिथि रहेका थिए ।
कार्यक्रममा नगर उपप्रमुख खड्कामाया पराजुली, वडा नं.६ का अध्यक्ष हरिशचन्द्र बास्तोला, कार्यपालिका सदस्य चन्द्र तामाङ, स्थानीय पाठ्यक्रम लेखन विज्ञहरू, विद्यालयका प्रधानाध्यापक, शिक्षक तथा सरोकारवालाहरूको उल्लेखनीय उपस्थिति रहेको थियो ।
उक्त अवसरमा सम्बोधन गर्दै प्रमुख अतिथि नगर प्रमुख गोम्देनले नगरभित्र शिक्षाको गुणस्तर क्रमश: सुधार हुँदै गएकोमा खुसी व्यक्त गर्दै विद्यालय व्यवस्थापन समिति, प्रधानाध्यापक, शिक्षक, विद्यार्थी तथा अभिभावकहरूलाई धन्यवाद दिए ।
कार्यक्रममा औचित्यमाथि प्रकाश पार्दै शिक्षा अधिकृत हरिबहादुर कुवरले नगरपालिकाले शिक्षाको गुणस्तर अभिवृद्धिका लागि सञ्चालन गरेका विभिन्न कार्यक्रमहरूको जानकारी गराएका थिए ।
सो अवसरमा स्थानीय पाठ्यक्रम विकास तथा निर्माण समितिका संयोजक बद्री प्रसाद ओली तथा पाठ्यक्रम लेखन विज्ञ सूर्यप्रसाद सापकोटा, लक्ष्मी माध्यमिक विद्यालयकी प्रधानाध्यापक निर्मला पोख्रेल लगायतले आ-आफना धारणा व्यक्त गरेका थिए ।
