नेपाल विद्यालय कर्मचारी परिषद् तथा बालविकास सञ्जाल बिर्तामोड नगर कार्यसमितिले विद्यालय कर्मचारीका समस्या समाधानको माग गर्दै नगर प्रमुख र नगर शिक्षा शाखा प्रमुखलाई ज्ञापनपत्र बुझाएको छ ।
नगर कार्यसमितिले आर्थिक वर्ष २०८३/८४ को बजेटमा विद्यालय कर्मचारीका मागहरू बेवास्ता गरिएको भन्दै गम्भीर असन्तुष्टि व्यक्त गर्दै बिर्तामोड नगर प्रमुख पवित्रा महतारा प्रसाईं र शिक्षा शाखा प्रमुख तिलचन भण्डारीलाई ज्ञापनपत्र बुझाएको हो ।
नेपाल विद्यालय कर्मचारी परिषद् झापाका अध्यक्ष चन्द्रप्रसाद प्रसाईं, बालविकास सञ्जाल बिर्तामोड नगर कार्यसमिति संयोजक विष्णुदेवी बुढाथोकी (विन्दा) र नेपाल विद्यालय कर्मचारी परिषद् बिर्तामोड नगर कार्यसमिति अध्यक्ष डिल्लीराम नेपालले नगर प्रमुख प्रसाईं र भण्डारीलाई बुझाएको ज्ञापनपत्रमा ६ बुँदे माग अघि सारिएको छ ।
कार्यसमितिले नगर प्रमुखलाई बुझाएको ज्ञापनपत्रमा विद्यालय सञ्चालनमा मेरुदण्डको रुपमा काम गरिरहेका विद्यालय कर्मचारी तथा बालविकास शिक्षकको श्रम, योगदान र भविष्य प्रति राज्य जानकार भए पनि निरन्तर उपेक्षा गरिरहनु अन्यायपूर्ण विभेदकारी व्यवहार हो । राज्यले यस वर्गलाइ सधै काम गर्ने हतियारको रुपमा प्रयोग गरिरहेको छ । उनिहरुको सम्मान जनक जीवनयापन, सामाजीक सुरक्षा तथा सेवा सुविधा प्रति संवेदनशीलता नदेखाउनु खेदजनक रहेको उल्लेख गरिएको छ ।
त्यस्तै ज्ञापनपत्रमा विद्यालय स्थापना कालदेखि हालसम्म निरन्तर सेवामा खटिरहेको यो वर्गलाइ सेवा सुविधाको नाममा न्यूनतम पारिश्रमिक भनेर अझ मनोवल गिराउन राज्य लागी परेको देखिन्छ । विगतका वर्षहरुमा पनि हामी विद्यालय कर्मचरी तथा बालविकास शिक्षकबाट यस कार्यालय अथवा स्थानिय सरकार सामु पटक पटक मागपत्र बुझाउने काम भएकै हो । सो माग पत्रको सुनुवाई आजका दिन सम्म भएको पाइएन । आशा छ आगामी दिनमा यस पत्रमार्फत व्यक्त गरिएका हाम्रा माग मुद्धा पूर्णतया सम्बोधन हुनेछन् भन्ने आशा व्यक्त गर्न चाहन्छौ ।
ज्ञापनपत्रमा विद्यालय कर्मचारी र बालविकास शिक्षकहरुको दरबन्दी, सेवा सर्त सम्बन्धि स्पष्ट कानुनी व्यवस्था सहितको स्थानिय शिक्षा ऐनमा समावेश गरियोस । उक्त ऐनमा कर्मचारी र बालविकास शिक्षकहरुको तलब भक्ता तथा सेवा सुविधाहरु कर्मचारीलाई निजामती कर्मचारी सरह र बालविकास शिक्षकलाई प्रा.वि.शिक्षक सरह हुनेगरी स्थानिय बजेटमा व्यवस्था गरियोस्, आगामी आ.व.२०८३/०८४ को बजेटमा विद्यालय कर्मचारी र बालविकास शिक्षकहरुलाई दरबन्दी अनुसारको सेवा सुविधाको व्यवस्था गरियोस्, विद्यालय कर्मचारी र बालविकास शिक्षकहरुलाई आ.व.२०८३/०८४ देखि सञ्चय कोषको व्यवस्थाको माग गरिएको छ ।
त्यस्तै सामाजिक सुरक्षा कोषमा आबद्धता गराइयोस्, अवकास पछी सञ्चित विदा, बिमारी विदा साथै औषधी उपचार खर्चको व्यवस्था गरियोस्, आ.व.२०८३/०८४ देखि ६० वर्ष पुगेर अवकास हुने विद्यालय कर्मचारी र बालविकास शिक्षकहरुको सम्मानजनक सेवा सुविधाको व्यवस्था गरियोस् लगायतका मागहरु समेत रहेका छन् ।
