विश्वभर महिलाहरूले पुरुषको तुलनामा झन्डै २५ प्रतिशत बढी समय खराब स्वास्थ्य अवस्थामा बिताउने गरेको एक नयाँ अध्ययनले देखाएको छ ।
म्याकिन्से हेल्थ इन्स्टिच्युट र विश्व आर्थिक मञ्चले २० वटा भन्दा धेरै स्वास्थ्य संस्थाको सहभागितामा गरेको अध्ययनले यो अन्तरको ठूलो हिस्सा रोक्न सकिने निष्कर्ष पनि निकालेको छ ।
अध्ययनका अनुसार महिला र पुरुषबीचको यो स्वास्थ्य अन्तरको ३४ प्रतिशत हिस्सा स्वास्थ्य सेवाका कमजोरीहरूबाट उत्पन्न भएको हो । ढिलो निदान, अपर्याप्त जाँच, अपुरो उपचार र कम उपचारको पहुँच यसका मुख्य कारण रहेका छन् ।
अध्ययनले हृदय रोग, पाठेघरको मुखको क्यान्सर, स्तन क्यान्सर, गर्भावस्थाको उच्च रक्तचाप, प्रसवपछिको रक्तस्राव, रजोनिवृत्ति, पिएमएस, माइग्रेन र एन्डोमेट्रियोसिस गरी नौ वटा प्रमुख स्वास्थ्य अवस्थाहरू पहिचान गरेको छ, जसमा तत्काल सुधार गर्न सकिने ठूलो सम्भावना रहेको छ ।
यो स्वस्थ समय अन्तरका कारण हरेक वर्ष विश्वभर ७५ करोड वर्षभन्दा बढी जीवनकाल खराब स्वास्थ्य वा असमयको मृत्युमा गुम्ने गरेको छ । अध्ययनले महिलाको स्वास्थ्य सुधार गर्नु केवल मानवीय आवश्यकता मात्र नभई सामाजिक र आर्थिक समृद्धिका लागि पनि अपरिहार्य रहेको निष्कर्ष निकालेको छ ।
