नेपालमा १२ वर्षमुनिका बालबालिकामा पनि चुरोटको लतमा रहेका पाइएको छ ।
नेपाल स्वास्थ्य अनुसन्धान परिषद्ले गरेको अध्ययनमा यो तथ्य पाइएको अनुसन्धानकर्ता कुसुम शाहीले जानकारी दिइन् ।
‘विश्व सुर्तीजन्य पदार्थरहित दिवस’ का अवसरमा आज स्वास्थ्य सेवा विभागले आयोजना गरेको कार्यक्रममा अध्ययन प्रतिवेदन प्रस्तुत गर्दै अनुसन्धानकर्ता शाहीले सात वटै प्रदेशका ५० वटा विद्यालयमा कक्षा ७ देखि १० सम्म पढ्ने तीन हजार बालबालिकामा अध्ययन गरिएको जानकारी दिइन् ।
उनका अनुसार अध्ययनमा १० वर्षमुनिका बालबालिकाले पनि चुरोट प्रयोग गर्ने गरेको र १२ मुनिकै बालबालिका चुरोटको लतमा रहेको पाइएको हो । अध्ययनमा सहभागी मध्ये ५७ प्रतिशतले बिहान उठ्ने बित्तिकै चुरोट खाने गरेको र ७४ प्रतिशतले चुरोट छाड्न कोशिश गरे पनि नसकिरहेको बताएका थिए ।
यस्तै कार्यक्रममा स्वास्थ्य तथा खाद्य स्वच्छता मन्त्रालयका अतिरिक्त सचिव डा.श्रीकृष्ण श्रेष्ठले नेपालमा सुर्तीजन्य पदार्थका कारण हरेक वर्ष ३९ हजारभन्दा धेरै मानिसको ज्यान जाने गरेको जानकारी गराएका थिए ।
विश्वभर सुर्तीजन्य वस्तुको प्रयोगका कारण हरेक वर्ष झन्डै ८० लाख मानिसको ज्यान जाने गरेको तथ्याङ्क छ । मुटुरोग, क्यान्सर, श्वासप्रश्वाससम्बन्धी रोग तथा अन्य नसर्ने गम्भीर रोगको प्रमुख कारण सुर्तीजन्य पदार्थ रहेको डाक्टर श्रेष्ठले बताए ।
सार्वजनिक ठाउँमा धूम्रपान निषेध, विज्ञापन तथा प्रवर्द्धन नियन्त्रण, चित्रसहितको स्वास्थ्य चेतावनी र कर नीतिलाई नियन्त्रणका प्रमुख उपायका रूपमा कार्यान्वयन गरिरहेको उनको भनाइ छ ।
