माध्यमिक शिक्षा परीक्षा (एसईई) मा शतप्रतिशत नतिजा ल्याउन सफल झापाको भद्रपुर नगरपालिका-९ मा अवस्थित ग्यालेक्सी अंग्रेजी स्कुलले ३२ जना विद्यार्थीलाई सम्मान गरेको छ ।
विद्यालयबाट परीक्षामा सहभागी उत्तीर्ण सम्पूर्ण विद्यार्थीलाई आज एक कार्यक्रमको आयोजना गरेर सम्मान गरेको हो ।
व्यवस्थापन समितिका अध्यक्ष विमल अग्रवालको अध्यक्षतामा भएको सम्मान कार्यक्रममा भद्रपुर नगरका शिक्षा शाखा प्रमुख पवित्रा ढकाल, सञ्चालकहरु सुनिल घिमिरे, देव गोयल र रोनक वंशल लगायतले विद्यार्थीलाई सम्मान गरेका थिए ।
विद्यालयका अनुसार निरन्तर शैक्षिक गुणस्तर, अनुशासन तथा आधुनिक शिक्षण पद्धतिलाई प्राथमिकतामा राखिएकाले उत्कृष्ट नतिजा हासिल गर्न सफल भएको जनाएको छ ।
विद्यालय व्यवस्थापनका अनुसार २०६१ सालदेखि भद्रपुर-८ सगरमाथा चोक क्षेत्रमा विद्यालय सञ्चालन सुरु गरिएको थियो भने २०७३ सालदेखि भद्रपुर-९ मा करिब ७ बिघा क्षेत्रफलमा फैलिएको परिसरबाट पठनपाठन हुँदै आएको छ ।
विद्यालयले आगामी शैक्षिक सत्रका लागि कक्षा ११ मा व्यवस्थापन संकायतर्फ व्यवसाय अध्ययन तथा कम्प्युटर शिक्षा विषयमा भर्ना खुला गरिएको जानकारी पनि दिएको छ ।
शिक्षक देवीप्रसाद सुवेदीले स्वागत गरेको कार्यक्रमको सञ्चालन विद्यालयका भाइस प्रिन्सिपल विवेक चम्लागाईंले गरेका थिए ।
