झापाका ६ वटा विद्यालयमा २० भन्दा कम विद्यार्थी रहेको पाइएको छ ।
मेचीनगरको श्रीकृष्ण प्राथमिक विद्यालयमा जम्मा ९ जना विद्यार्थी छन् । इसिडी २ र अन्य कक्षाका ७ गरी त्यहाँ ९ जना विद्यार्थी अध्ययनरत रहेका हुन् । त्यहाँ ३ जना शिक्षक कार्यरत छन् भने मेचीनगरकै मेची प्राविमा इसिडी ८ र अन्य कक्षाको ३ गरी जम्मा ११ जना विद्यार्थी अध्ययनरत रहेका छन् । उनीहरुलाई पढाउन एकजना शिक्षक कार्यरत छन् ।
त्यस्तै अर्जुनधारा नगरपालिकामा रहेको भागवत भक्ति आश्रममा ६ जना विद्यार्थी रहेका थिए । सत्यापनपछि अहिले विद्यार्थी संख्या २४ पुगेको छ । त्यहाँ दुईजना शिक्षक कार्यरत छन् ।
त्यसैगरी गौरादह नगरपालिकास्थित तालिमूल फकिरढिपमा इसिडी १० र अन्य कक्षाका १० गरी २० जना विद्यार्थी छन् भने उनीहरुलाई पढाउन एकजना शिक्षक छन् भने गौरादहकै शिवशक्ति विद्यापीठमा १८ जना विद्यार्थी पढाउन पाँचजना शिक्षक रहेका छन् ।
त्यस्तै बुद्धशान्तिमा रहेको तिरुपति संस्कृत गुरुकुल पाठशालामा २० जना विद्यार्थी पढाउन दुई जना शिक्षक कार्यरत रहेका छन् । त्यहाँ कक्षा ६ देखि ८ सम्म पढाइ हुने गरेको छ ।
सामुदायिक विद्यालयहरुमा विद्यार्थीहरुको आकर्षण घट्दै गएपछि स्थानीय तहहरुले विद्यालय मर्ज गर्न थालेका छन् । भद्रपुर नगरपालिकाले सामुदायिक विद्यालय समायोजन तथा शिक्षक दरबन्दी मिलान गरेको छ । नगरपालिकाले विद्यालय समायोजन तथा दरबन्दी मिलान कार्यविधि-२०८३ अनुसार नगरभित्रका चारवटा विद्यालयलाई समायोजन र २३ शिक्षक (बाल विकाससहित) को दरबन्दी मिलान गरेको हो ।
त्यसैगरी कमल गाउँपालिकाले पनि विद्यालय समायोजन गरेको छ भने बाह्रदशी र कचनकवल गाउँपालिकाले दरबन्दी मिलान गरेका छन् । प्रतिदिन दैनिकबाट
