विद्यालयको सिकाइ उपलब्धि स्तर कमजोर भएको पाइएको छ ।
गणित, विज्ञान तथा प्रविधि, नेपाली र अंग्रेजी विषयको परीक्षण गर्दा सिकाइ स्तर कमजोर भएको पाइएको हो ।
महालेखा परीक्षक कार्यालयको ६३ औं वार्षिक प्रतिवेदन अनुसार शिक्षा ऐन, २०२८ को दफा ७ (ख) मा विद्यालयको गुणस्तर परीक्षण गर्ने व्यवस्था छ ।
शिक्षा, विज्ञान तथा प्रविधि मन्त्रालयले हाल कायम ३५ हजार ४४७ विद्यालयमध्ये विगत १४ वर्षको अवधिमा ३, ५, ८ र १० कक्षाका विद्यार्थीहरूको सिकाइ उपलब्धिको राष्ट्रिय परीक्षण गरेको देखिन्छ ।
शैक्षिक गुणस्तर केन्द्रले कक्षा १० का विद्यार्थीहरूको सिकाइ उपलब्धि सम्बन्धमा पछिल्लो पटक २०८१ मा परीक्षण सम्पन्न गरेकोमा र गणित, विज्ञान तथा प्रविधि, नेपाली र अंग्रेजी विषयमा क्रमश: २०.४, २९.४, २५.९, १२.२ प्रतिशत विद्यार्थीहरू कक्षा तहभन्दा तल रहेका छन् ।
‘गुणस्तर परीक्षण न्यून सङ्ख्यामा गरेको र सिकाइ उपलब्धि स्तर कमजोर रहेको हुँदा सिकाइ उपलब्धि स्तरमा गुणात्मक सुधार ल्याउन विशेष कार्यक्रम सञ्चालन गर्नुपर्दछ,’ प्रतिवेदनमा उल्लेख छ ।
