२ जेठ, बिर्तामोड — झापाका पत्रकार इन्द्रकुमार राईले प्रधानमन्त्री बालेन शाहको राजिनामा माग गर्दै पैदल यात्रा सुरु गरेका छन्। शुक्रबार जेठ १ गते देखि उनले आफ्नो मोटरसाइकल प्रयोग नगरी अनिश्चितकालीन पैदल यात्रा गर्ने घोषणा गरेका हुन्।
राईले पेट्रोलियम पदार्थमा सरकारले गरेको मूल्यवृद्धि जनतामाथि अन्याय भएको आरोप लगाएका छन्। उनका अनुसार भारतमा प्रतिलिटर पेट्रोलको मूल्य १०० भारु भए पनि नेपालमा २१६ रुपैयाँ पुगेको छ। “पहिले कांग्रेस, एमाले, माओवादीको सरकार हुँदा सानो मूल्यवृद्धिमा पनि सडक आन्दोलन हुन्थ्यो, अहिले बालेन सरकारले प्रतिलिटर ५० रुपैयाँ बढाउँदा किन मौनता छ?” उनले प्रश्न उठाए।
उनले डिजेल र खाना पकाउने ग्यासमा पनि मूल्यवृद्धि भएको भन्दै सरकारको नीतिलाई सामन्ती र निरंकुशतावादी भनेका छन्। साथै, निजी सञ्चारगृहलाई दिइँदै आएको सरकारी विज्ञापन कटौती गरी सरकारी मिडियालाई मात्र दिने निर्णय प्रेस स्वतन्त्रतामाथि आक्रमण भएको आरोप लगाएका छन्।
राईले सुकुम्बासी बस्तीमा डोजर चलाएर घर भत्काउने कार्यलाई “डोजर आतंक” भन्दै आलोचना गरेका छन्। उनका अनुसार वैकल्पिक आवासको व्यवस्था नगरी गरिएका कारबाहीले विस्थापन मात्र नभई आत्महत्यासम्मको घटना निम्त्याएको छ।“देश बनाउने होइन, भत्काउने र जलाउने मात्र काम भएको छ,” उनले भने। संसदमा उपस्थित नभई सिंहदरबारबाट लाइभ हेर्ने प्रधानमन्त्रीको शैलीलाई उनले लोकतान्त्रिक मूल्यविपरीत भनेका छन्।
