झापाको बिर्तामोड-३ मा अवस्थित लिङ्कन मन्टेश्वरी विद्यालयले दीक्षान्त समारोह आयोजना गर्दै युकेजी उत्तीर्ण भएका आठ जना विद्यार्थीलाई सम्मान गरेको छ ।
कार्यक्रमका प्रमुख अतिथि साहित्यकार सत्यनारायण तायलले दीक्षित विद्यार्थीहरूलाई प्रमाणपत्र प्रदान गरेका थिए ।
विद्यालयको नवौं वार्षिक खेलकुद कार्यक्रमअन्तर्गत विभिन्न विधामा प्रथम, द्वितीय र तृतीय स्थान हासिल गर्ने नर्सरी, एलकेजी र युकेजीका विद्यार्थीहरूलाई समेत मेडल, प्रमाणपत्र, माला तथा खादा प्रदान गरी सम्मान गरिएको थियो ।
उक्त सम्मान कार्यक्रममा प्रमुख अतिथि तायल, सञ्चारकर्मी लवकुक्ष गौतम तथा विद्यालय व्यवस्थापन समितिका अध्यक्ष दिनेश ओझा लगायतको उपस्थिति रहेको थियो ।
यातायात सुविधा सम्पन्न लिङ्कन मन्टेश्वरीले बालमैत्री वातावरणमा अध्ययन-अध्यापन गराउँदै आएको छ । दीक्षान्त समारोहमा सहभागी अभिभावकहरूले विद्यालयप्रति सन्तुष्टि व्यक्त गर्दै आफ्ना छोराछोरीको भविष्यप्रति ढुक्क भएको प्रतिक्रिया दिएका थिए ।
विद्यालयका सञ्चालक सरोज पौडेलले बालबालिकाको मनोविज्ञान अनुसार शैक्षिक क्यालेन्डर निर्माण गरी सिकाइ प्रक्रिया सञ्चालन गर्दै आएको बताए ।
उनका अनुसार विद्यालयले एसेम्बलीमा स्वस्ति वाचन, सामाजिक अनुशासन तथा विभिन्न अतिरिक्त क्रियाकलाप र प्रतियोगिता मार्फत विद्यार्थीको समग्र विकासमा जोड दिँदै आएको छ ।
उक्त अवसरमा बोल्दै प्रमुख अतिथि तायलले साना बालबालिकाको सफलतामा सहभागी हुन पाउँदा खुसी लागेको उल्लेख गरेका थिए ।
हाल विद्यालयमा ८० भन्दा बढी विद्यार्थी अध्ययनरत छन् भने १० जना मन्टेश्वरी शिक्षिकाहरू कार्यरत रहेका छन् ।
