झापा गाउँपालिकाले प्राविधिक विषयमा उच्च शिक्षा अध्ययनरत ७४ जना विद्यार्थीलाई छात्रवृत्ति वितरण गरेको छ ।
आर्थिक वर्ष २०८२/०८३ को स्वीकृत वार्षिक कार्यक्रमअनुसार प्रोत्साहनस्वरूप उक्त रकम प्रदान गरिएको गाउँपालिकाले जनाएको छ ।
गाउँपालिकाका प्रमुख प्रशासकीय अधिकृत जनार्दन निरौलाका अनुसार गाउँपालिकाभित्र स्थायी बसोबास गरी विभिन्न कलेज तथा विश्वविद्यालयमा प्राविधिक शिक्षा अध्ययन गरिरहेका विद्यार्थीहरूको आर्थिक भार कम गर्ने उद्देश्यले कार्यक्रम सञ्चालन गरिएको हो ।
प्राप्त विवरणअनुसार सर्वाधिक छात्रवृत्ति चिकित्सा (मेडिकल) क्षेत्रमा अध्ययनरत ३२ जना विद्यार्थीले पाएका छन् भने सूचना प्रविधि (आईटी)तर्फ २२ जना, इन्जिनियरिङतर्फ ७ जना, कृषि तथा वनतर्फ ७ जना र अन्य प्राविधिक विषय अध्ययनरत ६ जना विद्यार्थी लाभान्वित भएका छन् ।
कार्यवाहक अध्यक्ष अन्जु देवी थपलियाले प्राविधिक शिक्षा महँगो हुने भएकाले विद्यार्थी र अभिभावकलाई केही राहत पुगोस् भन्ने उद्देश्यले छात्रवृत्ति वितरण गरिएको बताइन् ।
शिक्षा शाखाका अनुसार प्रत्येक विद्यार्थीलाई १२ हजार रुपैयाँका दरले छात्रवृत्ति प्रदान गरिएको छ। यसरी कुल ७४ जना विद्यार्थीलाई ८ लाख ८८ हजार रुपैयाँ वितरण गरिएको गाउँपालिकाले जनाएको छ ।
