पठन संस्कृति अभियानले आगामी निर्वाचन लक्षित ५ बुँदे किताब खोई अभियान सञ्चालन गर्ने भएको छ ।
फागन २१ मा सम्पन्न हुने निर्वाचनमा उमेद्वारहरुले प्रकट गर्ने वचनबद्धता तथा घोषणापत्रमा किताब सम्बन्धी एजेण्डा राख्न दबाब दिने उद्देश्यले यो अभियान सञ्चालन गरिएको अभियानका संयोजक तीर्थ सिग्देलले जानकारी दिए ।
पठन संस्कृतिको विकास गर्नको लागि पढौँ अघि बढौँ भन्ने मुख्य उद्देश्य लिएर झापाका १०० भन्दा बढी संस्थाको सामुहिक अभियान अन्तर्गत पठन संस्कृति वर्ष २०२६ मनाउँदै गरेको छ । हरेक मानिसको व्यक्तित्व विकास गर्नको लागि पढ्न जरुरी छ । पुस्तक पढेर कुनै न कुनै नयाँ अनुभव हासिल गर्न सकिन्छ भन्ने कुरामा अभिप्रेरित गर्ने हेतुले अभियानको प्रारम्भ गरिएको हो ।
आगामी फागुन २१ मा सम्पन्न हुने आम निर्वाचनमा उमेद्वारहरुले उठाएका स्थानीय तथा राष्ट्रिय मुद्दाले जनमानसमा जागरुकता पैदा गराउँदै लगेको मात्र छैन, जनतामाझ आशाको सञ्चार पनि गराएको छ । तसर्थ दल तथा स्वतन्त्र विचारले आफ्नो क्षेत्र र भूगोलको पहिचान अनि इतिहासप्रति के कति गौरव गर्न लायक विषयहरुको उठान गरिरहको छ भन्ने सवाल अहिले ज्वलन्त बनेर उदाएको छ ।
यसै सन्दर्भमा सञ्चालन गरिएको यो अभियानले आफ्नो भूगोलको इतिहासप्रति गौरव गर्ने अनि यो माटोको मायाले देखाउने सद्भावले पनि जनमत बटुल्न र मतदाताको भावना जित्न मद्दत गर्नका साथै झापा जिल्लाको गौरव, गाथा अनि यस जिल्लाको राष्ट्रिय महत्व र ख्याति बढाउन सहयोग पुग्ने संयोजक सिग्देललको धारणा छ ।
त्यस्तै उमेद्वार बनेर आफ्नो क्षेत्रका मतदाताको घरदैलोमा पुग्दा व्यक्त गर्ने विचार र प्रतिवद्दतालाई बौद्धिक वर्गले पनि नियालिरेहको हँदा यस अभियान मार्फत् पठन संस्कृति निर्माण गर्न घोषणा पत्रमा यो विषयलाई कति महत्व दिइएको छ भन्ने अभियानको चासो रहेको अभियानका सह-संयोजक केशव मैनालीले बताएका छन् ।
यसक्रममा अभियानको तर्फबाट झापा जिल्लाबाट निर्वाचनमा उमेद्वार बनेका व्यक्तिहरुलाई भेट गरी यस अभियान बारे जानकारी गराउने र आफ्नो एजेण्डामा यस विषयलाई अनिवार्य समेट्न आग्रह गरिने पठन अभियन्ता सन्तोष आचार्यले बताए ।
यस्ता छन् अभियाद्वारा उमेद्वारहरुलाई दिइएको केही सुझावहरु:
१) आफ्नो घोषणापत्रमा कम्तीमा एक वडामा एक सार्वजनिक पुस्तकालय स्थापना गर्ने वा भएका पुस्तकालय सञ्चालन गर्न बजेट बिनियोजन गरी मद्दत गर्ने ।
२) आफ्नो क्षेत्रमा रहेका सरकारी, गैरसरकारी, बैंक तथा वित्तीय संस्थामा अनिवार्य रुपमा मिनी लाइब्रेरी स्थापना गर्न पहल गर्ने ।
३) आफ्नो क्षेत्रमा रहेका नीजि तथा सरकारी विद्यालयको शैक्षिक गुणस्तर उकास्न अनिवार्य रुपमा किताबका लािग बजेट छुट्याउने ।
४) आफ्नो क्षेत्रमा आयोजना गरिने सार्वजनिक कार्यक्रमहरुमा अतिथिहरुलाई मायाको चिनो दिँदा पुस्तक दिने चलन चलाउने ।
५) हरेक वडामा कम्तीमा एक स्थानलाई सार्वजनिक स्थल तय गरी त्यसै स्थानमा कार्यक्रम हलसहितको पुस्तकालय र सार्वजनिक पार्क बनाउने ।
