झापाको बिर्तामोडस्थित एभरेष्ट स्मार्ट एकेडेमी र एभरेष्ट स्पोट्स एकाडेमीको आयोजनामा तेस्रो हरिकुमार प्रसाईं स्मृति जिल्ला स्तरीय अन्तरविद्यालय यु-१३ नकआउट फुटबल प्रतियोगिता सुरु भएको छ ।
विद्यालयका संस्थापक प्रसाईंको स्मृतिमा हरेक वर्ष उक्त प्रतियोगिता हुँदै आएको छ । बिहीबार पहिलो खेल एभरेष्ट स्मार्ट एकाडेमी र इष्ट होराइजन धुलाबारीबीच भएकोमा १-० को अन्तरले इष्ट होराइजन विजयी भएको छ । कार्यक्रमकी प्रमुख अतिथि बिर्तामोड नगरपालिकाकी प्रमुख पवित्रा महताराले प्रतियोगिताको उद्घाटन गरेकी थिइन् ।
विद्यालयका प्रबन्ध निर्देशक आशिष प्रसाईंको अध्यक्षतामा भएको समारोहमा राम सिटौला, प्रशान्त भण्डारी, हरिकुमार पाठक, सूर्य कन्दङ्वा, गजेन्द्र पौडेल, न्यूटन्स एजुकेशन फाउण्डेशनका प्रिन्सिपल देबेन्द्र हुमागाँई लगायतको आतिथ्यता रहेको थियो ।
प्रबन्ध निर्देशक प्रसाईंले आफ्ना स्व.पिताको शिक्षा प्रतिको लगाव सोच र योगदानको चर्चा गर्दै विद्यालयले गरिरहेका गतिविधि बारे जानकारी गराएको उद्धघाटन समारोहको सञ्चालन शिक्षक सावित्रा भट्टराईले गरेकी थिइन् ।
यसैबीच विद्यालय र एभरेष्ट बाल क्लबले दुई जना क्यान्सर पीडित बालकलाई सहयोग गरेका छन् ।
बाह्रदशी निवासी ३ वर्षीय नुतन राजवंशी र भद्रपुर निवासी ६ वर्षीय आरोन धमालालाई जनही ३५ हजार रुपैयाँका दरले सहयोग प्रदान गरिएको प्रिन्सिपल अनुप शर्माले जानकारी दिए ।
