युनिटी कप टी-२० क्रिकेट शृंखलाको तेस्रो तथा अन्तिम खेलमा नेपाल वेस्ट इन्डिजसँग पराजित भएको छ ।
मंगलबार राति यूएईको शारजाह क्रिकेट मैदानमा सम्पन्न अन्तिम खेलमा नेपाल १० विकेटले पराजित भएको हो ।
जितका लागि १२३ रनको सामान्य लक्ष्य पाएको वेस्ट इन्डिजले १२.२ ओभरमै कुनै विकेट नगुमाएर लक्ष्य भेटायो । वेस्ट इन्डिजको जितमा अमिर जांगोले ७५ र अकिम अगस्टेले ४१ रन बनाएका थिए ।
टस हारेर सुरुमा ब्याटिङको निम्तो पाएको नेपालले १९.५ ओभरमा १२२ रन बनाएको थियो । नेपालका लागि ओपनर कुशल भुर्तेलले सर्वाधिक ३९, कप्तान रोहित पौडेलले १७ र कुशल मल्लले १२ रनको योगदान गरे भने सन्दीप जोराले १४ रन बनाए । बाँकी कुनै पनि ब्याट्सम्यानले उल्लेखनीय स्कोर बनाउन सकेनन् ।
वेस्ट इन्डिजका बलर रामोन सिमोन्ड्स सर्वाधिक चार, जेडिया ब्लेड्सले दुई विकेट लिए भने जेसन होल्डर र स्पिनर अकिल होसेन एक-एक विकेट लिएका थिए ।
अन्तिम खेलमा पराजित भए पनि वेस्ट इन्डिजविरुद्धको टी-२० क्रिकेट शृंखलाको उपाधि नेपालले जितिसकेको छ । नेपालले वेस्ट इन्डिजलाई पहिलो खेलमा १९ रनले हराएको थियो भने दोस्रो खेलमा नेपाल ९० रनको सानदार जित निकालेको थियो ।
