वेस्ट इन्डिजविरुद्धको युनिटी कप टी-२० क्रिकेट शृंखलाको उपाधि नेपालले एक खेल अगावै जितेको छ ।
संयुक्त अरब इमिरेट्सको शारजाह क्रिकेट मैदानमा गएराती भएको खेलमा नेपालले वेस्ट इन्डिजलाई ९० रनको फराकिलो अन्तरले पराजित गर्दै शृङ्खलाको उपाधि जितेको हो ।
गएरातिको खेलमा नेपालले दिएको एक सय ७४ रनको लक्ष्य पछ्याएको वेस्ट इन्डिज ८३ रनमा अलआउट भयो । वेस्ट इन्डिज १७ दशमलव एक ओभरमा सबै विकेट गुमाउदै ८३ रनमा समेटिएको थियो ।
वेस्ट इन्डिजका लागि जेसन होल्डरले सर्वाधिक २१ रन बनाए भने एकिम अगष्टले १७ तथा अमिर जांगोले १६ रन जोडेका थिए ।
नेपालको लागि आदिल आलमले ४ विकेट लिए भने कुशल भुर्तेलले तीन, ललित राजवंशी र दीपेन्द्रसिंह ऐरीले १-१ विकेट लिएका थिए ।
यसअघि टस जितेर पहिला ब्याटिङ गरेको नेपालले निर्धारित २० ओभरमा छ विकेट गुमाएर एक सय ७३ रनको योगफल बनाएको थियो । नेपालका लागि आसिफ शेखले ६८, सन्दीप जोराले ६३ र मोहम्मद आदिल आलमले ११ रन बनाएका थिए ।
वेस्ट इन्डिजका लागि कप्तान अकिल होसेन र कायल मायर्सले समान दुई-दुई विकेट लिए भने जेडिया ब्लेड्सले एक विकेट लिएका थिए ।
