संस्कृत भाषा संरक्षण र प्रवर्द्धनका लागि झापाको शिवसताक्षीमा १५ दिने आवासीय संस्कृत भाषा सिकाई तालिम सुरु भएको छ ।
गोलोक गोवर्धन गौशाला र श्री शताक्षी संस्कृत गुरुकुलको संयुक्त आयोजनामा शताक्षीधामस्थित गौशालाको सभा हलमा शनिबारदेखि तालिम सुरु भएको हो ।
हराउँदै गएको संस्कृत भाषालाई जगेर्ना गर्न र नयाँ पुस्तामा यसको ज्ञान विस्तार गर्ने उद्देश्यले तालिम सञ्चालन गरिएको आयोजक संस्थाले जनाएको छ । तालिम साउन १७ गते समापन हुने छ ।
उक्त तालिमको सहजीकरण समीक्षा सुवेदीले गरिरहेकी छन् । तालिममा श्री शताक्षी संस्कृत गुरुकुलका ४१ जना र सरस्वती कन्या गुरुकुल माईधारका ११ छात्रासहित ५५ जना छात्रछात्राको सहभागिता रहेको छ ।
तालिमको उद्घाटन अमेरिकाबाट आएका आचार्य पण्डित बिदुरप्रसाद दाहालले गरेका थिए । उद्घाटन मन्तव्यमा उनले संस्कृत भाषा मानव सभ्यताको मूल भाषा भएको उल्लेख गर्दै यसको उत्पत्ति र ऐतिहासिक पक्षबारे प्रकाश पारे । उनका अनुसार संस्कृत भाषा वैदिक युगमै अस्तित्वमा आएको हो र यो ब्रह्माको मुखबाट उत्पत्ति भएको धार्मिक मान्यता रहेको छ ।
कार्यक्रममा गोलोक गोवर्धन गौशालाका संरक्षक तथा अध्यक्ष आचार्य श्री नन्दकिशोर जी महाराज, युरोप, नेपाल, भारत र भुटानमा ख्यातिप्राप्त पण्डित कुबेर सुवेदी, नेपाल-भारत हिन्दु महासङ्घका केन्द्रीय प्रवक्ता आचार्य पण्डित घनश्याम खनाल, भुवनेश्वरी दाहाल लगायतले संस्कृत भाषालाई व्यवहारिक स्तरमा प्रयोगमा ल्याउनुपर्नेमा जोड दिए ।
उक्त कार्यक्रमको सञ्चालन आचार्य पण्डित मदनमोहन अधिकारीले गरेका थिए ।
