झापाको बिर्तामोडमा अवस्थित महेन्द्र रत्न माध्यमिक विद्यालयले माध्यमिक शिक्षा परीक्षा एसईईमा उत्तीर्ण अर्थात् ग्रेडेड विद्यार्थीहरुलाई बधाई तथा शुभकामना दिएको छ ।
बिर्तामोड नगरपालिका-३ मा अवस्थित विद्यालयको नमुना भवनमा भएको कार्यक्रममा माध्यमिक शिक्षा परीक्षा २०८१ मा उत्तीर्ण हुने र उच्च जीपीए प्राप्त गर्ने विद्यार्थी र तिनका अभिभावकहरूको उपस्थिति रहेको थियो ।
विद्यालय व्यवस्थापन समितिका अध्यक्ष हरिचरण शिवाकोटीको सभापतित्वमा भएको कार्यक्रममा बिर्तामोड नगरपालिका वडा नं.३ का वडाध्यक्ष मदन बुढाथोकी, विद्यालय व्यवस्थापन समिति सदस्य श्रीप्रसाद न्यौपाने, नेत्रप्रसाद खरेल, शिक्षक अभिभावक संघका अध्यक्ष यामप्रसाद भट्टराई, अभिभावक पदमप्रसाद बास्कोटा, विद्यालयका प्रधानाध्यापक खड्गप्रसाद खरेल लगायतले बधाई तथा शुभकामना मन्तव्य राखेका थिए ।
विद्यालयको इतिहासमा पहिलोचोटि ४ जीपीए प्राप्त गर्ने विद्यार्थी विद्या दाहाललगायत चेतन गौतमले विद्यार्थीहरूको तर्फबाट आफ्ना अनुभवहरू राखेका थिए ।
विद्यालयले ७१ प्रतिशत परिणाम प्राप्त गरेको छ । ११ जना विद्यार्थीहरूले ३.६ जीपीए बढी अङ्क प्राप्त गर्न सफल भएका छन् भने जम्मा १०७ जना विद्यार्थीहरु कक्षा ११ वा माथिल्ला विभिन्न विषय र संकायमा पढ्नको लागि योग्य बनेका छन् । ४३ जना विद्यार्थीहरू श्रावण अन्तिम सातादेखि सुरु हुने ग्रेडवृद्धि परीक्षामा सामेल हुने प्रधानाध्यापक खरेलले जानकारी दिएका छन् ।
विद्यालयका सहायक प्रधानाध्यापक केशव प्रसाईंले मन्तव्यबाट स्वागत गरेको कार्यक्रमको सञ्चालन विद्यालयका अर्का सहायक प्रधानाध्यापक एवं जीव विज्ञान विषय शिक्षक तुलसीराम खरेलले गरेका थिए ।
