भद्रपुर । राष्ट्रिय प्रजातन्त्र पार्टी (राप्रपा) कचनकवल गाउँ समितिको अधिवेशन सोमबार सम्पन्न भएको छ ।
कचनकवल ६ स्थित सामुदायिक भवन बनियानीमा आयोजित गाउँ अधिवेशनले राप्रपा गाउँ समितिको अध्यक्ष रविचन्द्र ओझालाई निर्विरोध चयन गरेको छ ।
ओझाबाहेक अन्यले अध्यक्ष पदमा दावेदारी नदिएपछि पुनः ओझालाई पाँच वर्षीय कार्यकालका लागि पुनः अध्यक्षमा निर्विरोध चयन गरेका हुन । अध्यक्षमा ओझालाई चयन गरे पनि राप्रपा गाउँ समितिमा गाउँपालिकाको सातै वडाबाट सदस्यहरू चयन गरी समितिलाई थप विस्तार गरिने जनाइएको छ ।
समारोहका प्रमुख अतिथि राप्रपाका नेता राजेन्द्र लिङदेनले अधिवेशनको उद्घाटन गर्दै कचनकवलमा पार्टीलाई थप मजबुत र विस्तार गर्न नवनिर्वाचित अध्यक्षले महत्त्वपूर्ण भूमिका खेल्नु पर्ने बताउनुभयो ।
पार्टी एकतापछि अहिले राप्रपा जिल्लाभरि वडा, गाउँ तथा नगर समिति विस्तार अभियानमा लागि परेको बताउँदै उहाँले भन्नुभयो -‘राजतन्त्रसहितको हिन्दु राष्ट्र पुनर्स्थापना हाम्रो मुख्य लक्ष्य र अभियान हो ।’
कार्यक्रममा राप्रपा पार्टीका केन्द्रीय सदस्य टेकनारायण राजवंशी, केन्द्रीय कार्य सम्पादन समितिका सदस्य देवुरमण भट्टराई, गाउँपालिकाका अध्यक्ष अञ्जार आलम, उपाध्यक्ष निमसरि राजवंशी, जिल्ला सदस्यहरू सत्यनारायण यादव, धनवीर तामाङ, गाउँ समिति सदस्यहरू अम्बास आलम , फाल्गुनी राजवंशी लगायतले मन्तव्य राख्नुभएको थियो।
सो कार्यक्रममा विभिन्न पार्टी परित्याग गरी २७ जना राप्रपामा प्रवेश गरेको जनाइएको छ ।
