साहित्य चौतारी बिर्तामोडले कनकाई-३ स्थित सुरुङ्गाको कनकाई माध्यमिक विद्यालयलाई अक्षय कोषका लागि ५ लाख ५५ हजार ५५५ रुपैयाँ प्रदान गरेको छ ।
चौतारीले ‘हर्क-लोक स्मृति प्रतिभा पुरस्कार स्थापनाका लागि शनिवार विद्यालय परिसरमा आयोजित एक कार्यक्रमकाबीच अक्षयको रकम हस्तान्तरण गरेको हो ।
स्व.हर्कबहादुर प्रधान तथा लोकबहादुर पौडेलको स्मृतिमा साहित्य चौतारी हर्क-लोक स्मृति प्रतिभा पुरस्कारको लागि कनकाई माविलाई अक्षयकोष हस्तान्तरण गरिएको थियो ।
अक्षयकोषकी संस्थापक तथा संरक्षक मुनादेवी श्रेष्ठ, बेनुकुमारी श्रेष्ठ पौडेल, साहित्य चौतारीका संस्थापक संरक्षक तथा बर्तमान अध्यक्ष देवीभक्त श्रेष्ठसहित चौतारीका पदाधिकारी तथा सदस्यहरुले ५ लाख ५५ हजार ५५५ रुपैयाँ बराबरको चेक प्रधानाध्यापक कर्णकहादुर डाँगी र विद्यालय ब्यवस्थापन समितिका अध्यक्ष चन्द्रप्रसाद प्रसाईलाई हस्तान्तरण गरेका छन् ।
साहित्य चौतारीका संस्थापक संरक्षक तथा बर्तमान अध्यक्ष श्रेष्ठले लोक र हर्क आफ्ना भेनाजु र ज्वाई मात्र नभएर आफ्नो ब्यवसायिक क्षेत्रका गुरु र सहयोगी भएकाले उनीहरुको नाम जीवन्त राख्ने उद्देश्यले अक्षयकोष स्थापना गरी विद्यालयलाई हस्तान्तरण गरेको बताए ।
कनकाई माविका विद्यालय ब्यवस्थापना समितिका अध्यक्ष चन्द्रप्रसाद प्रसाईको अध्यक्षतामा भएको कार्यक्रममा कनकाई प्रतिभा प्रतिष्ठान सुरुङ्गाका अध्यक्ष जीवनाथ सुवेदीको प्रमुख आतिथ्य रहेको थियो ।
विद्यालयका प्रधानाध्यापक डाँगीले स्वागत गर्दै विद्यालयले एक करोडको अक्षयकोष स्थापना गर्ने अभियान सञ्चालन गरेको र हालसम्म १३ बढी संघसंस्था तथा ब्यक्तिले बिभिन्न अक्षयकोष स्थापना गरेर करिव २३ लाख रुपैयाँको पुर्याएको बताए ।
कार्यक्रममा प्रमुख अतिथि सुवेदी, चाहित्य चौतारीका अध्यक्ष देबीभक्त श्रेष्ठ, कनकाई-३ का वडाध्यक्ष युवराज चम्लागाई, विद्यालयका सल्लाहकार संयोजक जर्नादन उप्रेती, शनिश्चरे क्याम्पसका प्रमुख मोहनप्रसाद ओली, अक्षय कोषकी संरक्षक मुनादेवी श्रेष्ठलगायतले आ-आफ्नो भनाई राखेका थिए ।
साहित्य चौतारीको प्रायोजक तथा आयोजनामा भएको अक्षय कोष स्थापना कार्यक्रममा लोकगायक तथा साहित्य चौतारीका सल्लाहकार अनिरुद्र ओली, कनकाई-३ का वडा सदस्य गोविन्द सुवेदी, साहित्य चौतारीका पदाधिकारी तथा सदस्यहरुको उपस्थिति रहेको कार्यक्रमको सञ्चालन विद्यालयका सहायक प्रधानाध्यापक तीर्थराज खरेलले गरेका थिए ।
