आसन्न स्वतन्त्र विद्यार्थी युनियन (स्ववियू) को निर्वाचनका लागि झापाको बिर्तामोड-८ स्थित गरामनी क्याम्पसमा जम्मा ४० जना विद्यार्थीमध्ये २० जना उम्मेदवार बनेका छन् ।
कुल विद्यार्थीमध्ये आधा उम्मेदवार बनेका हुन् । नेकपा एमाले निकट अखिल नेपाल स्वतन्त्र विद्यार्थी यूनियन, नेपाली कांग्रेस निकट नेपाल विद्यार्थी संघ र राप्रपा निकट राष्ट्रिय प्रजातान्त्रिक विद्यार्थी संगठनले प्रत्यक्षतर्फ १५ जना र समानुपातिकतर्फ पाँच जनाको उम्मेद्वारी दिएका हुन् ।
अनेरास्ववियूले अध्यक्षमा बिमला गिरी, सचिवमा सुनिता संग्रौला, कोषाध्यक्षमा अञ्जली मुर्मू र सदस्यमा दावा तामाङलाई उठाएको छ भने नेविसंघका तर्फबाट अध्यक्षमा रोनिश पाठक, सचिव सन्जिला कार्की, कोषाध्यक्ष खुश्बु खातुन तथा सदस्यमा तीर्थबहादुर तामाङ, मनिका मगर, सरिष्मा मगरले उम्मेद्वारी दिएका छन् भने समानुपातिकतर्फ गंगाराम खड्का र मिनाकुमारी आचार्य सदस्यको उम्मेदवार बनेका छन् ।
त्यस्तै राप्रविसंका तर्फबाट केशव खरेल अध्यक्षको उम्मेदवार बनेका छन् । सन्दिप अधिकारी सचिव, रामकृष्ण पौडेल कोषाध्यक्ष, सुदिप ढकाल सदस्यको उम्मेदवार बनेका छन् ।
क्याम्पसले स्ववियू निर्वाचन गराउन प्राध्यापक कृष्ण दाहालको संयोजकत्वमा तीन सदस्यीय निर्वाचन समिति गठन गरेको छ । जसको सदस्यहरुमा भूपेन्द्र राउत र खेमबहादुर बस्नेत छन् । थोरै विद्यार्थी भएका कारण क्याम्पस प्रशासनले निर्वाचन नगराई सर्वसम्मत गराउने प्रयास गराएको थियो । तीन वटा राजनीतिक दलका नेताहरु आ-आफ्ना उम्मेदवार जिताउन लागि परेका छन् ।
