दुई प्रवासी महिलाले शिवसताक्षीको एक सामुदायिक विद्यालयको जस्ता पाताका लागि आर्थिक सहयोग गरेका छन् ।
वैदेशिक रोजगारका लागि इजरायलमा रहेका दुई महिलाले स्थानीय वडा नम्बर ८ कोे अरुणोदय आधारभूत विद्यालयको कक्षा कोठाको छानाका लागि जस्ता पाता उपलब्ध गराएको विद्यालय प्रशासनले जनाएको छ ।
शिवसताक्षी नगरपालिका वडा नम्बर ८ का वडाध्यक्ष सन्तकुमार फेउदिनका अनुसार चन्द्रा थापा मगर र नम्रता पाठकले विद्यालयको छाना फेर्नका लागि सहयोग गरेका हुन् । स्थानीय सन्देश लावती र दिलिप लावतीको सहजीकरणमा प्रवासी नेपाली महिलाले विद्यालयलाई सहयोग गरेको वडाध्यक्ष फेउदिनले बताए ।
विद्यालय हातामा रहेको एउटा रुखको हाँगा काट्ने क्रममा रुखको हाँगा लागेर विद्यालयको छाना (जस्ता पाता) मा नराम्ररी क्षति पुगेको थियो । कक्षा कोठामा विद्यार्थी बस्नै नहुने गरी भएको क्षति आफूहरूलाई असह्य भएको भन्दै दाताले जस्तापाता उपलब्ध गराएको विद्यालयका प्रधानाध्यापक तारा लावतीले बताइन् ।
वडाध्यक्ष फेउदिन, वडा कार्यपालिका सदस्य विवेक थिङ, विद्यालय व्यवस्थापन समितिका अध्यक्ष मदन सिलवाल, स्थानीय अभिभावक, शिक्षक लगायतको सहभागिता थियो ।
उक्त विद्यालयमा यसै साता एकजना दाताले ५० हजार अक्षय कोषका लागि रकम जम्मा गरेका छन् । थापा मगर र पाठकले यसअघि शिवसताक्षीकी फूलमाया उपरकोटीको उपचारमा आर्थिक सहयोग गरेका थिए । ती दाताले आफूले कमाएको रकमबाट समाजका लागि वर्षेनि खर्च गर्ने गरेका छन् ।
