झापाको अर्जुनधारा नगरपालिका-२ मा अवस्थित नवज्योती आधारभुत विद्यालयको वार्षिकोत्सव मंगलबार सम्पन्न भएको छ ।
विभिन्न कार्यक्रमको आयोजना गर्दै विद्यालयले ५५ औं वार्षिकोत्सव मनाएको हो ।
वार्षिकोत्सवको अवसरमा खेलकुद समापन, पुरस्कार वितरण, सम्मान तथा विदाई कार्यक्रम सम्पन्न भएको हो ।
विद्यालय व्यवस्थापन समितिका अध्यक्ष खगेन्द्र कोइरालाको अध्यक्षतामा भएको कार्यक्रममा अर्जुनधारा नगरपालिका वडा नम्बर २ का वडाध्यक्ष नरेन्द्रकुमार श्रेष्ठको प्रमुख आतिथ्य रहेको थियो ।
कार्यक्रममा विद्यालयका प्रधानाध्यापक लोकनाथ कोइरालाले वार्षिक प्रगति प्रतिवेदन प्रस्तुत गरेको कार्यक्रममा विद्यालयले गत वर्षको परिक्षामा विद्यालय प्रथम भएकी छात्रा टंककुमारी रिमाल र दोश्रो भएका छात्र निश्चल गुरुङलाई नगद तथा शैक्षिक सामाग्रीसहित पुरस्कृत गरिएको थियो ।
यस्तै वर्ष उत्कृष्ट शिक्षकको रुपमा दीपक मिश्र र सुशीला कुईकेललाई सम्मान गरिएको थियो । वर्ष उत्कृष्ट अभिभावकको रुपमा विर्खबहादुर आले मगर र गंगामाया रमतेललाई समेत विद्यालयले सम्मान गरेको थियो ।
उक्त अवसर पारेर २०८० मा कक्षा ५ उत्तीर्ण भई विदा भएका विद्यार्थीहरुलाई शैक्षिक नतिजा पुरस्कार २०८० प्रदान गर्दै विदाई गरिएको थियो ।
कार्यक्रममा विद्यालयले सञ्चालन गरेको खेलकुद सप्ताहमा विभिन्न विद्यामा उत्कृष्ट भएका विद्यार्थीहरुलाई पुरस्कार वितरण गरिएको थियो ।
सोहि अवसरमा अभिभावक तथा विद्यार्थीहरु विभिन्न खेलकुद गतिविधिमा सहभागी बनेका थिए भने विद्यार्थीहरुले सांस्कृतिक तथा सांगीतिक प्रस्तुतिले मनोरञ्जन गराएका थिए ।
कार्यक्रममा प्रमुख अतिथि वडाअध्यक्ष नरेन्द्रकुमार श्रेष्ठ, गाँजाबारी बेलटार खानेपानी संस्थाका अध्यक्ष योगेन्द्र आचार्य, शान्ति सामुदायिक वन उपभोक्ता समितिकी उपाध्यक्ष लक्ष्मी कन्दङवा लिम्बू, पूर्व विद्यार्थी तथा नेपाल पत्रकार महासंघ झापाका सहसचिव तिलक योञ्जन लगायतले शुभकामना मन्तव्य राखेका थिए ।
शिक्षक सविता खत्रीले मन्तव्यबाट स्वागत गरेको कार्यक्रमको सञ्चालन दिपक मिश्रले गरेका थिए ।
