झापाको बिर्तामोड नगरपालिका वडा नं.१० मा अवस्थित लक्ष्मीनारायण आधारभूत विद्यालयको २५ औं वार्षिकोत्सव तथा रजत जयन्ती कार्यक्रम मंगलबार सम्पन्न भएको छ ।
विद्यालय व्यवस्थापन समितिका अध्यक्ष तोमप्रसाद ओलीको अध्यक्षतामा भएको कार्यक्रमको प्रमुख अतिथि कोशी प्रदेशका सांसद छविलाल चुडाल रहेका थिए ।
उक्त अवसरमा कोशी प्रदेश सरकारबाट विनियोजित १५ लाख रकमबाट दुई कोठे भवनको शिलान्यास समेत गरिएको थियो । भवनको शिलान्यास कार्यक्रमका प्रमुख अतिथि प्रदेश सांसद छविलाल चुडाल र बिर्तामोड नगरपालिकाका प्रमुख पबित्रा महतरा प्रसाईंले संयुक्तरुपमा गरेका थिए ।
वार्षिकोत्सवको अवसर पारेर दाता, अभिभावक, शिक्षक र विद्यार्थीलाई सम्मान गरिएको थियो । यसरी सम्मानित हुने दाताहरुमा अभिचन्द्र आचार्य, लिलादेवि आचार्य, भद्रमाया शिवाकोटी, मायादेवि उप्रेती, डिप्रोस लघुवित्त गरामनी, मनराम स्मृति प्रतिष्ठान, सहारा नेपाल सहकारी बिर्ताबजार, नेशनल लघुवित्त बिर्तामोड र महेश्वर ओली रहेका छन् ।
त्यस्तै चन्द्रमान राई, ज्ञानुनाथ मैनाली, छविलाल बस्नेत, धर्मानन्द अर्याल, दधिराम रसाइली, मोहन उप्रेती, नरप्रसाद शिवाकोटी, तुलसीप्रसाद सुवेदी, शम्भुप्रसाद घिमिरे, विष्णु लिंदेन र हेमबहादुर गुरुङ रहेका छन् ।
त्यसैगरी उत्कृष्ट शिक्षकबाट झनकप्रसाद कोइराला, विद्यार्थीबाट खुसी पाठक र अभिभावकबाट सुशिला सार्कीलाई सम्मान गरिएको थियो ।
कार्यक्रममा बोल्दै प्रमुख अतिथि प्रदेश सांसद चुडालले सामुदायिक र संस्थागत विद्यालयलाई प्रतिस्पर्धाको रुपमा नभएर एकअर्काका परिपूरक रुपमा हेर्नुपर्ने बताए ।
सामुदायिक विद्यालयमा अध्ययन गरेका विद्यार्थीहरुले विश्वका विभिन्न ठाउँमा पुगेर आफ्नो क्षमता देखाइसकेकाले सामुदायिक विद्यालयमा अध्ययन गरेका विद्यार्थीलाई कमजोर नठान्न चुडालले आग्रह गरेका थिए ।
प्रधानाध्यापक जनकबहादुर थापाले विद्यालयको वार्षिक प्रतिवेदन प्रस्तुत गरेको कार्यक्रममा बिर्तामोड नगरपालिकाका प्रमुख पबित्रा महतरा प्रसाईं, बिर्तामोड शिक्षा शाखा प्रमुख तिलचन भण्डारी लगायतले शुभकामना मन्तव्य राखेका थिए ।
विद्यालयका शिक्षक झनकप्रसाद कोइरालाले मन्तव्यबाट स्वागत गरेको कार्यक्रमको सञ्चालन निर्मला न्यौपानेले गरेकी थिइन् ।
