आर्थिक, सामाजिक र भौगोलिक हिसाबले पछि परेको सीमावर्ती बाह्रदशीको अमृत माविमा दाताहरु न्यानो कपडा लिएर पुग्दा अधिकांश सीमान्तकृत समुदायका विद्यार्थीहरु खुशी भएका छन् ।
पहिलो पटक दाताहरु आएको हुनाले न्यानो कपडा लिन विद्यार्थीहरु आतुर देखिए । विद्यालयका विपन्न विद्यार्थीहरुलाई लीलामाया खड्का आदर्श फाउन्डेशनले न्यानो कपडा गरेको हो ।
गरिब तथा विपन्न वर्गका ४९६ जना विद्यार्थीलाई न्यानो कपडा वितरण गरिएको फाउन्डेशनकी संरक्षक शिखा खड्का गणेशले जानकारी दिइन् । लीलामाया खड्का आदर्श फाउन्डेशन, झापा एफसी, फ्रेन्जको सहयोगमा वितरण गरिएको न्यानो कपडा वितरणको कार्यक्रमको व्यवस्थापन सहारा नेपालले गरेको हो ।
विद्यालयका प्रधानाध्यापक रामबहादुर बुढाथोकीले आफ्नो विद्यालयमा वर्षौपछि परोपकारी संस्थाले विद्यार्थीहरुलाई सहयोग गरेकोमा धन्यवाद व्यक्त गरेका छन् ।
उक्त कार्यक्रमका प्रमुख अतिथि सहारा नेपालका कार्यकारी प्रमुख महेन्द्रकुमार गिरीले विपन्न विद्यार्थीलाई न्यानो कपडा वितरण गरेर फाउन्डेशनले ठुलो योगदान गरेको बताए ।
विद्यालय व्यवस्थापन समितिका अध्यक्ष भूमिराज थापाको अध्यक्षतामा भएको कार्यक्रममा पूर्व मन्त्री टेकनारायण राजवंशीलगायतले मन्तव्य राखेका थिए ।
