झापाको बिर्तामोड-५ मा अवस्थित न्यूटन्स एजुकेशन एकाडेमी रहेको न्युटन्स टुरिजम क्लबले सुखानी सहिद स्मृति पार्कको अवलोकन गरेको छ ।
टुरिजम क्लबका विद्यार्थीहरूले पर्यटनको अचुक सम्भावना बोकेको ऐतिहासिक सुखानी पार्कको शुक्रबार भ्रमण गरेका हुन् ।
विद्यार्थीहरुले पर्यटनको सम्भावना र सदुपयोग कसरी गर्ने, युवा, बालबालिका र शिक्षाको क्षेत्रबाट यो पार्कलाई के कसरी काम गर्न सकिन्छ भन्ने उद्देश्यले अध्ययन तथा अवलोकन गरिएको क्लबका संयोजक पवित्रा पौडेलले जानकारी दिइन् ।
बालबालिकाहरुलाई भाषा, साहित्य भूगोल र पर्यटनसँग जोड्ने उद्देश्यले विद्यालयमा स्थापना भएको टुरिजम क्लवले स्थानीय क्षेत्रमा पर्यटकीय सम्भावना भएका ठाँउको पहिचान गरि तिनलाई राष्ट्रिय तथा आन्तराष्ट्रियस्तरमा प्रवर्धन गर्दै विकासको क्रममा जोडन् सक्रियतापूर्वक लागि परेको क्लबका संयोजक पौडेलले बताइन ।
कक्षा १० को सामाजिक अध्ययन विषय अन्तर्गत हाम्रो विगत एकाईमा पार्कको विषयमा पठनपाठन समेत हुने भएकाले विद्यार्थीले सुनेर भन्दा पनि हेरेर, महसुस गरेर धेरै कुरा सिक्ने तथा बुझ्नेसँगै संरक्षण गर्ने दायित्व बुझाउन भ्रमणमा सहभागी गराइएको विद्यालयका प्रधानाध्यपक एंवम क्लव संरक्षक देवेन्द्र हुमागाईंले बताए ।
उक्त भ्रमणलाई श्री सुखानी वन उपभोक्ता समितिका उपाध्यक्ष विपिन कुमार चौहानले सहजीकरण गरि सहयोग गरेका थिए ।
क्लबका ११ जना सदस्य सहभागी भएको कार्यक्रममा उपाध्यक्ष चौहानका अनुसार शौचालय, खानेपानी र बिजुलीबत्ती उपलब्ध गराएर पार्कलाई व्यवस्थित गरिने बताएका छन् ।
उपाध्यक्ष चौहानका अनुसार पार्कमा बालबालिकालाई खेल्नका लागि पिङ, चिप्लेटीलगायतका प्लास्टिकका संरचना बनाइएका छन् । पार्कलाई पर्यटकीय स्थलको रुपमा विकास गर्न आगामी दिनमा स्थानीय सरकार र वन उपभोक्ता समितीसँग समन्वय गरेर अगाडि बढ्ने बताए ।
सुखानी स्मृति सहिद पार्क झापाको खुदुनाबारी र इलामको दानावारी नजिकैको सुखानी जंगलको मध्यभागमा पर्छ । राजनैतिक इतिहास र पर्यटकीय दृष्टिकोणले महत्वपूर्ण यो पार्क झापा विद्रोहुका क्रममा वि.स.२०२९ फागुन २९ गते पाँच जना कम्युनिस्ट कार्यकर्ताको हत्या गरिएको स्थानमा निर्माण गरिएको हो । यहाँ सानातिना चौतारा तथा बगैंचा निर्माण गरिएको छ भने त्यहाँ सुरक्षाकर्मीले हत्या गरेका रामनाथ अधिकार, कृष्ण कुइँकेल, वीरेनसिहं राजवंशी, नेत्र घिमिरे तथा नारायण श्रेष्ठको स्मारक पनि छ ।
