वीर अमरसिंह माध्यमिक विद्यालयका पूर्व विद्यार्थी खोमा उप्रेती अधिकारी र नरमाया उप्रेती कडरियाले आफ्ना माता-पिताको स्मृतिमा विद्यालयमा अक्षय कोष स्थापना गरेका छन् ।
विद्यालयमा अध्ययनरत गरिब, जेहेन्दार, फरक क्षमता भएका, अतिरिक्त क्रियाकलापमा अब्बल भएका लगायतका विद्यार्थीहरुको शैक्षिक उन्नतीमा सहयोग पुर्याउने उद्देश्यले दुईलाख दुई हजार दुई सय बराबरको ‘यज्ञकुमारी-जीवनाथ उप्रेती स्मृति’ अक्षय कोष स्थापना गरेका विद्यालय व्यवस्थापन समितिका अध्यक्ष किशोरकुमार पौडेलले जानकारी दिए ।
उक्त अवसरमा दाता परिवारका सदस्य, विद्यालय व्यवस्थापन समितिका सदस्य, शिक्षक-कर्मचारी लगायतको उपस्थिति रहेको थियो ।
यसैबीच विद्यालयले सहयोगी दाता प्रती आभार प्रकट गरेको छ । यस्ता पवित्र कार्यहरुमार्फत विद्यालय, पूर्व विद्यार्थी, विद्यालय तथा समुदाय बिचको सम्बन्ध थप बलियो बन्दै जाने विद्यालयले विश्वास लिएको छ ।
विद्यालयका प्रधानध्यापक खेमराज गौतमले मन्तव्यबाट स्वागत गरेको कार्यक्रमको सञ्चालन सहायक प्रधानध्यापक हेमकुमार उप्रेतीले गरेका थिए ।
