त्रिभुवन विश्वविद्यालयको पत्रकारिता तथा आमसञ्चार केन्द्रीय विभागमा तीज विशेष कार्यक्रम सम्पन्न भएको छ ।
विभाग अन्तर्गत स्नातकोत्तर (एमए) दोस्रो सेमेष्टरमा अध्ययनरत विद्यार्थीहरूको आयोजनामा बुधबार तीज विशेष कार्यक्रम सम्पन्न भएको हो ।
दोस्रो सेमेष्टरकी विद्यार्थी साङ्केन राईको सभापतित्वमा भएको कार्यक्रमको प्रमुख अतिथि पत्रकारिता तथा आमसञ्चार विभागका विभागीय प्रमुख डा.कुन्दनराज अर्याल रहेका थिए ।
उक्त कार्यक्रमको बीचबीचमा विद्यार्थीहरुले आ-आफना प्रतिभाहरु प्रस्तुत गरेका थिए ।
कार्यक्रममा बोल्दै कार्यक्रमका प्रमुख अतिथि विभागीय प्रमुख डा.कुन्दनराज अर्यालले तीज मनाउने तौरतरिका समयसापेक्षित रूपमा परिवर्तन हुनुपर्ने धारणा राखेका थिए ।
“५०/६० वर्ष अगाडिको तीज र अहिलेको तीज उस्तै हुनुहुन्न,” प्रमुख अर्यालले भने, “अब रुँदै माइतीघर जाने होइन, हाँसेरै जाने हो । श्रीमान्को खुट्टाको पानी खाने, यसो गर्ने उसो गर्ने अब हुनुहुन्न ।”
त्यस्तै उपप्राध्यापक डा.देवराज अर्यालले तीजको महत्त्वमाथि प्रकाश पार्दै शैक्षिक संस्थामा आयोजित यस्ता सांस्कृतिक कार्यक्रमले छुट्टै अर्थ राख्ने बताए ।
“विद्यार्थीहरूलाई हामीले प्रेजेन्टेसन गराउँछौँ, विद्यार्थीहरूले यसरी विभिन्न कार्यक्रमको आयोजना गर्छन् । यी कार्यक्रमहरू आपसमा सहयोगी बन्छन्,” अर्यालले भने, “यस्ता कार्यक्रमहरूले छुट्टै अर्थ राख्छन् । यो विद्यार्थीहरूको व्यक्तित्वसँग जोडिने कुरा पनि हो ।”
त्यसैगरी उपप्राध्यापक डा.घमराज लुइँटेलले शुभकामना दिँदै पत्रकारिता तथा आमसञ्चार केन्द्रीय विभाग त्रिविका अरु विभागहरूभन्दा सक्रिय रहेको बताए । “हामीले विद्यार्थीहरूलाई त्यसैगरी ट्रेन्ड पनि गरिरहेका हुन्छौँ,” लुइँटेलले भने, “पढाइसँगै अरु गितिविधिमा विद्यार्थी सक्रिय हुनु, अगाडि बढ्नु राम्रो हो । हामी अरु विभागभन्दा सक्रिय छौँ ।”
यस्तै उपप्राध्यापक शशी मरासिनीले सांस्कृतिक रूपमा तीजको महत्त्व भएको बताउँदै समयसँगै तीजको प्रकृति फेरिनुपर्ने बताए । “महिलाहरू सशक्त भइसकेका छन् । अब माइतीले बोलाएन भनेर रुनुपर्ने अवस्था छैन,” उनले भने, “तीजको महत्त्व छ तर, यसको नेचर फेरिनुपर्छ । फेरिँदै पनि छ ।”
त्यसैगरी प्राध्यापक लक्ष्मण हुमागाईंले कार्यक्रममार्फत आम नेपाली त्यसमा पनि दिदीबिहिनीहरूलाई शुभकामना व्यक्त गर्दै कार्यक्रम आयोजना भएकोप्रति खुसी साटेका थिए ।
त्यस्तै कार्यक्रममा एमए तेस्रो सेमेष्टरका विद्यार्थी बाबुराम आचार्यले कार्यक्रम आयोजना हुनु नै ठूलो कुरा रहेको उल्लेख गर्दै त्यसले निरन्तरता पाउनुपर्ने बताए ।
दोस्रो सेमेष्टरकी विद्यार्थी अनिशा पौडेलले मन्तव्यबाट स्वागत गरेको कार्यक्रमको सञ्चालन रन्जु अधिकारीले गरेकी थिइन् ।
औपचारिक कार्यक्रम भएपश्चात प्राध्यापक, निम्तालु विद्यार्थी तथा आयोजक विद्यार्थीहरू नृत्य गर्दै रमाइलो गरेर दर खाँदै शुभकामना आदानप्रदान गरेका थिए ।
