झापा गाउँपालिकाले कक्षा ११ र १२ मा अध्ययनरत सामुदायिक विद्यालयका ६३० जना विद्यार्थीहरुलाई छात्रवृत्ति प्रदान गरेको छ ।
झापा गाउँपालिकाभित्र अध्ययनरत ६३० जना विद्यार्थीहरुलाई छात्रवृत्ति वितरण गरिएको गाउँ शिक्षा समिति अध्यक्ष एवं गाउँपालिका कार्यवाहक अध्यक्ष अन्जु थपलियाले जानकारी दिइन् ।
गाउँपालिकाभित्र रहेका सामुदायिक विद्यालयमा अध्ययनरत अधिकांश विद्यार्थी विपन्न वर्गका भएकाले रकम अभावका कारण कुनै पनि विद्यार्थीले उच्च शिक्षाबाट वञ्चित हुन नपरोस् भनेर छात्रवृत्ति वितरण गरेको कार्यवाहक अध्यक्ष थपलियाले बताइन् ।
कार्यवाहक अध्यक्ष थपलियाका अनुसार पालिकाले छात्रवृत्ति स्वरुप कक्षा ११ का विद्यार्थीलाई जनही ९ हजार २ सय ५० रुपैयाँ र कक्षा १२ का विद्यार्थीलाई जनही ११ हजार २ सय रुपैयाँका दरले साथै प्राविधिक शिक्षाका विद्यार्थीलाई जनही १२ हजार रुपैयाँका दरले रकम वितरण गरेको छ ।
गाउँ शिक्षा शाखा प्रमुख जीवनप्रसाद ढकालका अनुसार ११ र १२ पठनपाठन हुने जनकल्याण माविमा अध्ययनरत ५६ विद्यार्थी, डिल्लीराज माविमा अध्ययनरत ३५२ विद्यार्थी र जनता माविमा अध्ययनरत २२२ विद्यार्थीलाई पालिकाको निति तथा कार्यक्रममार्फत छुट्टाएको बजेटबाट पालिकामा आयोजित कार्यक्रममा विद्यार्थीलाई छात्रवृत्ति प्रदान गरेको छ ।
झापा गाउँपालिका भित्र २१ वटा सामुदायिक विद्यालय, १४ वटा संस्थागत विद्यालय र १८ वटा मदरसा विद्यालय सञ्चालनमा रहेको शिक्षा प्रमुख ढकालले जानकारी दिए ।
झापा गाउँपालिकाले विगत २०७५ सालदेखि सामुदायिक विद्यालयमा अध्ययनरत विद्यार्थीहरुलाई छात्रवृत्ति वितरण गर्दै आएको छ भने विद्यार्थीलाई विद्यालय जाने वातावरण बनाउने उद्देश्यले प्रत्येक वर्ष कक्षा ९ मा अध्यनरत सामुदायिक विद्यालयमा अध्यनरत विद्यार्थीलाई साइकल समेत वितरण गर्दै आएको छ ।
