जाजरकोटको नलगाड नगरपालिका–१ मा रहेको चिउरी बस्तीमा शुक्रबार राती गएको भूकम्पमा परी १३ जनाले ज्यान गुमाएका छन्। दलित समुदाय बाहुल्यको बस्तीमा भूकम्पका कारण ४ महिला, ९ पुरुष र ५ बालबालिकाले ज्यान गुमाएका हुन्।

शुक्रबार दिउँसो मात्रै भारत रोजगारीबाट आफ्नो घर चिउरी बस्ती आइपुगेका ५० वर्षीय हिरा कामीसहित भूकम्पमा परेर श्रीमती, दुई छोरा (माइलो र कान्छो) को पनि मृत्यु भयो।

Advertisement

जेठा छोरा भारतमै छन् भने कान्छी छोरीको अस्पतालमा उपचार भइरहेको छ। उनी भूकम्पमै परेर घाइते भएकी हुन्। शुक्रबार रातीको भूकम्पपछि ज्यान गुमाएका चिउरी बस्तीका १३ जनाकै भेरी नदीमा सामूहिक दाहसंस्कार गरिएको छ।

दाहसंस्कार स्थल पुगेका कर्णाली प्रदेश सरकारका अर्थमन्त्री वेदराज सिंहले पीडित परिवारका राहतका लागि पहल भइरहेको आश्वासन दिए।