झापा । साहित्य र संस्कृतिका क्षेत्रमा कृयाशिल झापाली साहित्य समाजले सप्तरङ्गी कार्यक्रम गर्ने भएको छ ।
झापाको बिर्तामोडमा फरक शैलीमा आयोजना हुँदै आएको कार्यक्रम “सप्तरङ्गी”को चौथो शृङ्खला कार्तिक २५ गते शनिबार हुने अध्यक्ष हरि बरालले जानकारी दिए ।
झापाली साहित्य समाजले साहित्यका ७ विधाका ७ जना स्रष्टालाई समेटेर हरेक वर्ष कार्यक्रम गर्दै आएको छ ।
दीपावली तथा छैटको अवसर पारेर २०७५ सालबाट हरेक वर्ष आयोजना हुँदै आएको छ ।
२०७१ सालमा स्थापना भएको समाजले साहित्यको माध्यम बाट समाज लाई सकारात्मक बाटोमा डोर्याउन र संस्कृतिको बिकास गर्ने उदेश्य रहेको अध्यक्ष बरालले बताए ।
कोरोना लगायतका विभिन्न समस्याका कारण स्थगित रहेको कार्यक्रम पुन: सुचारु गर्ने उदेश्यका साथ सप्तरङ्गीको चौथो शृङ्खला आयोजना गरिएको बताईएको छ ।
सप्तरङ्गीको चौथो शृङ्खलामा पद्य कविता तर्फ कवि तुलसी प्रसाद भट्टराई र गद्य कवितातर्फ कवि डिजी शर्माको प्रस्तुति रहने भएको छ ।
त्यसैगरी, मुक्तकतर्फ मुक्तककार मदन भण्डारी र गीततर्फ आयुष घिमिरे रहने भएका छन् । यता, स्वतन्त्र गजलमा गजलकार राज यात्री लम्साल र बहर गजलमा गजलकार दीप प्रदीपको प्रस्तुति सुन्न पाइने भएको छ ।
रचना वाचनसँगै कार्यक्रममा नृत्य प्रस्तुति समेत रहने छ । जसमा कलाकार साया सुवेदीको प्रस्तुति रहने आयोजक समितिले जनाएको छ ।
